Farzana Sharshembaevanyń esimi álemge áıgili. Dese de týǵan jeri Qyrǵyzstanda Farzanany onyń paltosy belgili amerıkalyq sánger Donna Karannyń toptamasynda paıda bolǵanda ǵana bildi. Bul Farzananyń álemdik dızaınerler úshin jasaǵan alǵashqy jumysy emes. Onyń ónimin Eýropa, AQSH-tyń álemge tanymal sán áleminiń patshaıymdary men saıası kóshbasshylary kıedi, dep jazady Qamshy.kz aqparat agenttigi.
Farzana Sharshembıeva 24.kg-ge óz ónimderi jáne paltosy tanymal sángerdiń syrt kıim toptamasyna qalaı túskenin aıtyp berdi.
— Amerıkalyq sángermen qalaı tanystyńyz? Sizdiń jumysyńyz ony nesimen qyzyqtyrdy?
— Byltyr Santa-Fe (Nú-Meksıko shtaty) qalasynda ótken festıválde Donna Karan, DKNY jáne Urban Zen brendteriniń negizin qalaýshysy bizdiń ónimderdi kórip unatyp qaldy. Jibek matamyzdyń sapasyn joǵary baǵalady. Mundaı mata men dızaındy buryn-sońdy kezdestirmegenin aıtady. Ol tek maqtap qana qoımaı, barlyǵyn satyp aldy. «Onyń eskızi boıynsha tige alamyn ba?» dep surady. Osylaısha men alǵashqy tapsyrysymdy aldym. Ol bizdiń ulttyq boıaýymyz bilinip turatyn toptamany jasaýdy sheshti.
— Óte qymbat baǵada satylymǵa shyqqan palto týraly aıtyp berińizshi...
— Bul palto Donna Karannyń alǵashqy tapsyrysy boldy. Men ony basynan aıaǵyna deıin óz ádisim boıynsha qolmen tigip shyqtym. Onda tigisteri eki jaǵynda ǵana bar. Matasy – jibek pen toqyma. Ony tigýge tórt kún ketti.
— Donna Karan toptamańyzdaǵy buıymdardy qalaı tańdaıdy? Álde sizge syzbasyn bere me?
— Iá, ol syzbasyn berip, túsi qandaı bolý kerektigin aıtady. Al mata, tehnologıa men órnek bizdiń qalaýymyz boıynsha tigiledi. Donna taǵy bir paltoǵa tapsyrys berdi.
Farzana Sharshembıevanyń ápke-sińlilerimen qosylyp 7sisters brendin qurdy. Olar jumysyn 1998 jyly bastap, qazir óz isiniń bilgirlerine aınaldy. Ápkeli-sińliler túrli buıymdar jasaıdy, kıim tigedi, jibek pen kıizden ınterer buıymdaryn jasaıdy.
— Biz ónerli otbasynda dúnıege keldik. Ákemiz Jylkychy Sharshembıev sýretshi. Anamyz Jenısjan Esheeva ýchılıshede tigin tigýdi úıretetin. Olardyń memlekettik tapsyrys jasaýdan qoldary bosamaıtyn. Tapsyrysty ótkizetin ýaqyt taıaǵanda otbasymyzben uıyqtamaı, ata-anamyzǵa kómektestik. Sondyqtan ujymda aýyzbirshilikpen jumys jasaý bala kezimizden qalyptasqan. Ol qasıet eseıip, birigip jumys atqaryp jatqan shaǵymyzdy kóp kómegin tıgizip jatyr.
Men jáne Kadyrkýl panno, ala-kııız ben sháli tige bastadyq. Munymen aınalysý sińlilerimizge de unady. Osylaısha óz otbasylyq kásibimizdi ashamyz dep sheshtik.
— Amerıkalyqtar qyrǵyzdardyń ulttyq boıaýyn unatyp qalǵan sıaqty ǵoı...
— Ónimderimiz amerıkalyqtardyń arasynda suranysqa ıe bolǵandyqtan bastapqyda-aq amerıkalyq naryqta jumys isteımiz dep sheshtik. Belgili dızaınerlerdiń arqasynda biz týǵan jerimizden góri shetelde kóbirek tanyldyq.
Ónimderimizdiń jarnamasy álemdik deńgeıdegi festıválderge qatysýǵa múmkindik beredi. 2011 jyldan bastap Santa-Fe qalasynda ótetin dástúrli Álemdik festıváldiń turaqty qatysýshysymyz. Bıyl bizdiń stendimiz álem boıynsha usynylǵan 150 stendtiń ishinde úzdik bestikke kirdi.
Biz Anglıa, Germanıa, Italıa, BAE, Úndistanda ótken jármeńkege qatystyq. Italıa, Fransıa men Reseıdiń sán úılerinen usynystar túsip jatyr.
Apaly-sińliler IýNESKO-nyń «Sapa belgisi» 29 halyqaralyq sertıfıkatyn alǵan. Qujat eki jylda bir márte konkýrstyq negizde beriledi. Sapa men dızaınyn halyqaralyq sarapshylar baǵalaıdy.
Mundaı sertıfıkaty barlar eń bedeldi jármeńkelerge qatysyp, óz ónimderińizdi álem boıynsha satýǵa joldama alady. Sertıfıkat seriktester men satyp alýshylar úshin sheberlik pen sapany bildiredi.
— Biz 2012 jyly Nú-Meksıkoda (Oho Kalente shtaty) 100 adamǵa master-klass ótkizdik. Álemniń túkpir-túkpirinen kelgen stýdentter áli kúnge deıin bizge qyrǵyzdyń órnekteri bar buıymdardyń fotosyn jiberedi. Biz oǵan qatty qýanamyz.
— Siz amerıkalyq dızaıner Sharlotta Mosspen de jumys istedińiz be?
— Iá, byltyr Sharlotta Mosstyń tapsyrysyn oryndadyq. Bizdiń barlyq kıimimiz onyń toptamasyna kirdi. Onyń byltyrǵy Nú-Iorkte ótken toptama tanystyrylymynda kórsetilgen kıimderdiń barlyǵy bizdiń ónimnen turdy. Amerıkalyq Ibu Movement, Gypsy-global, HoonArts brendterimen de jumys isteımiz.
Bizdiń kıimdi Sıgýrnı Ýıver, Beatrıks Ost sekildi sán áleminiń patshaıymdarynyń kıgenin kórip qýandyq. Kann festıvalinde Gran-prı ıegeri Samal Eslámova bizdiń kıimde keldi.
— Álemge tanymal adamdar sizderdiń kıimderińizdi qaıdan satyp alady?
— Kóbi festıválderde. Ásirese Santa-Fe-de. Keıbiri tapsyrys berýshilerimizdiń dúkeninen satyp alady. Kıimderimiz mundaı dúkenderde 7sisters brendimen satylady.
