Serik Ǵarıf bıyl 6 qyrkúıekte tabeldik tapanshadan 34 jastaǵy basshysy Rústem Raqyshevqa Aqjaıyq aýdandyq ishki ister bólimi aldynda oq atty. Kisi óltirgen soń birden polısıaǵa berilgen.

Sot-psıhıatrıalyq saraptama qorytyndysy boıynsha, Serik Ǵarıftiń deni saý, aqyl-esi durys. Biraq kúdiktini tekserip shyqqan mamandardyń aıtýynsha, ol uzaq ýaqyt qysym kórý saldarynan týyndaǵan fızıologıalyq afekt jaǵdaıynda qylmys jasaǵan.

Serik Ǵarıf qylmysy týraly ózi tolyǵymen aıtyp berdi. Onyń sózine súıensek, Rústem Raqyshevpen jumys istegen alǵashqy kúnnen bastap, ekeýi bir-birin jaqtyrmaǵan. 

«Maǵan únemi tıisip júretin. Qaıta-qaıta eskertý jasap, basqalardyń kózinshe tómendetetin. Eshqashan durystap amandaspaı, únemi til tıgizip júrdi. Osynyń bári birtindep jınala berdi. Sol kúni taǵy da meniń namysyma tıdi. Sodan soń menimen basqa qyzmetkerlerge qarý alyp, jumysqa kirisýge buıyrdy. Qarý bólmesinen tapanshany alyp, shyǵa bergende, daladan Rústem Raqyshevty kórdim. Ádettegideı aıý sıaqty qorbańdap kele jatyr eken. Ony jek kóretinmin. Júris-turysy jynyma tıetin. Artynda kele jatyp, tapanshamdy shyǵardym da, aıaǵynyń astyna oq attym. Sodan soń, ne kóringenin bilmeımin, qalaı bolsa, solaı oq jaýdyra berdim. Ol sulap túsken kezde ǵana toqtadym», – dep Serik Ǵarıf saraptama kezinde jaýap bergen.

«Keri burylyp, kezekshiniń ústeline keldim de, tapanshany qoıyp: «Boldym» dedim. Basqa AİİB qyzmetkerleri júgirip kelip, qolymdy burady. Oqsaýyttaǵy qalǵan oq-dárini tartyp alyńdar dedim», – dep jalǵastyrdy eks-polıseı. 

Serik Ǵarıftiń uzaq ýaqyt boıy kúızeliste júrgenin onyń aǵasy Saqaýov ta aıtty. Kúdikti 2015 jyly kúzet qyzmetine jumysqa ornalasqaly beri Chapaev aýylyndaǵy sol aǵasynyń úıinde turǵan. Saqaýovtyń aıtýynsha, Serik Ǵarıftiń minezi tuıyq, jumysy týraly tis jarmaǵan. 

2017 jyly bir kúni aǵasy baýyrynyń jumystan unjyrǵasy túsip kelgenin baıqap qalǵan. Túski as kezinde nege kóńil-kúıi bolmaı júrgenin suraǵan. Serik Ǵarıf kenet jylap jiberip, qatty sharshaǵanyn, budan bylaı mundaı jaǵdaıda jumys isteı almaıtynyn aıtqan. Aǵasy ne bolǵanyn suraı bastaǵanda Serik Ǵarıf ústelden turyp, úıden shyǵyp ketip qalǵan. Sodan keıin onyń úıine eki kúnnen keıin kelgen jáne eshqashan jumysynda ne bolyp jatqanyn aıtpaǵan.

Ulynyń minezi tuıyq ekenin kúdiktiniń ákesi Serik Ǵarıf rastady.

«Onda ne bolǵanyn, qandaı sebeppen óltirgenin bilmeımin. Ulymmen kezdesýge birneshe ret bardym. Ol janjaldyń sebebin aıtpady. Anasymen júzdesýden bas tartyp, munda kelmeýin surady. Advokat jaldaýǵa tyıym saldy, oǵan áli kúnge deıin tegin, memlekettik advokat qyzmet kórsetýde», – deıdi Nurlan Ǵarıf.

Rústem Raqyshevtyń ata-anasy da janjaldyń sebebin bilmeıdi. Marqumnyń ákesi Jasqaırat Raqyshev sot- psıhıatrıalyq saraptamanyń qorytyndysymen kelispeıdi.

«Serik Ǵarıf ulymdy qasaqana óltirdi, eshqandaı afekt bolǵan joq. Serik túsiniktemesinde pyshaq alyp júrgenin aıtty. Iaǵnı ol bul qylmysqa daıyndalǵan», – deıdi ol. 

Rústem Raqyshevtyń týystary kúdiktini qaıta saraptamadan ótkizýdi talap etýde. Qujatta tergeýshi kóptegen  prosesýaldyq quqyq buzýshylyq jibergen, al bul qujatty zańsyz dep tanýǵa negiz bola alatyn kórinedi.   

Qazirgi tańda bul isti tergeý jalǵasyp jatyr.