«Kókjaılaýǵa» kýrort salý máselesiniń qyzý talqylanyp kele jatqanyna 16 jyldyń júzi boldy. Qoǵam ekige jaryldy. Biri onda qurylys jumystarynyń júrgizilýin qoldasa, endi biri qarsy shyqty. QR Eńbek sińirgen qaıratkeri, aqyn Júrsin Erman Kókjaılaýdaǵy qurylysqa qarsy shyǵyp júrgenderdiń arasynda arzan upaı jınap júrgender bar ekenin aıtqan edi. Júrsin Ermannyń sóziniń jany bar sekildi. "SSRO-ny otanym" dep esepteıtin, Reseımen qaıta birigip, bir el bolýdy qalaıtyn Oleg Sermuhamedov (Álıhan) qazaq jerinde neniń salynyp, neniń salynbaýy kerek ekenin, neniń durys, neniń burys ekenin aıtýǵa qanshalyqty moraldyq quqyǵy bar degen zańdy suraq týyndaıdy.

«Men SSRO-da dúnıege keldim. Kóptegen qazaqtar ishki túısigimen Reseıdi ananyń jyly qushaǵy retinde qabyldaıdy. Erte me, kesh pe, onyń qushaǵyna tyǵylýǵa týra keledi», - degen edi Oleg Sermuhamedov BAQ-qa bergen suhbatynda.

Osy suhbatta aıtqan úsh sóıleminen-aq táýelsiz elde ómir súre otyryp qaıta bodan bolýdy armandaıtynyn ańǵarýǵa bolady. Reseıdi anasynyń jyly qushaǵyndaı kóretin adamnyń oǵan degen mahabbatyn baǵamdaı berińiz.

Osydan biraz jyl buryn ulttyń tutastyǵy úshin ótkir pikir bildirip, Qazaqstannyń keleshegine beı-jaı qaramaıtyndardyń aıtqan pikirleri ózinikimen saı kelmedi me, álde máselege ulttyq kózqaraspen qarasaq, qaıta Reseıge bodan bolý armany alystaı túsedi dep qoryqty ma, Qazaqstandaǵy ultshyldardy ındeester degen edi. Ádettegideı biraz shý shyqty. Halyq dúrlikti. Shý basyldy.

Álıhandaı Alash kóseminiń esimi buıyrǵan Sermuhamedovtyń ózin Oleg deýinde de bir gáp bar-aý. Árıne, táýelsiz Qazaqstanda turyp jatsa da kelmes kúnderdi ańsaý, quldyq sanadan aryla almaı sonyń jeteginde júrý árkimniń óz sheshimi. Alaıda ony ózgege tańý, soǵan shaqyra otyryp, el ishindegi máselelerge aralasyp, el, jurtqa aqyl aıtýy qanshalyqty durys? Sebebi ony qazaq jeri retinde emes, «Matýshka Rossıanyń jeri» dep qaraıtyn sekildi. Munda másele Kókjaılaýda kýrort salý nemese salmaýda da emes, shýly máselede qaıta-qaıta bas kóterip, bodan bolýdy armandaıtyn adamnyń elge aqyl aıtýy eki ushty oıǵa jeteleıdi. 

Mundaıdy qorlaý retinde qabyldap, tek qazaq arasyndaǵy ultshyldarǵa ǵana qatysty emes, búkil qazaqqa qarata aıtylǵan sóz dep qabyldaǵandar da kóp boldy.

Árıne, "quldyq sanadan aryla almaı júrgen bir pátshaǵar ǵoı" dep qoldy bir-aq silteıin deseń, SSRO-ny ananyń jyly qushaǵyna balap jáne  BAQ betterinde óz oıyn ózgelerge tanýǵa talpynǵany alańdatady. Reseımen ortaq memleket quryp, dál SSRO kezindegideı Batystan oqshaýlaýdy armandaıtynyn onyń áleýmettik jelide jazǵan ár jazbasynan ańǵarýǵa bolady. Onyń ótkenniń qańsyǵyna degen saǵynyshy ár sózinen kórinip turady. Ótkendi zor sanap, táýelsiz eldi qor sanaǵanyn myna jazbasynan anyq seziledi.

«Ol ýaqytta ádildik zańnan joǵary turatyn. Naqtyraq aıtsaq, zań ádildikke moıynsunatyn... Ákimder, jemqor sýdıalar, saıasatkerler, sapasyz bilim, kommersant dárigerler, tańdaýly adamdardyń ofshordaǵy qarjysy... Munyń barlyǵyn kórip qusqyń keledi, betiń qyzarady. Osynyń barlyǵy «Mahabbat, Komsomol men Kóktemdi» almastyrdy» dep jylarman bolypty Oleg myrza.

Mine, komsomoldy dúrkiretip toılaıtyndar da, táýelsiz eldiń turǵyndaryn qaıta bodan bolýǵa shaqyratyn da, ótkenniń qaldyǵyn dáripteıtin de osylar. Sóıte tura eldegi ishki máselelerge qol suǵyp, bireýge aqyl úıretkenine jol bolsyn, Oleg!