Kúndelikti ómirde árqaısysymyzdyń óz erejemiz ben ustanatyn jeke saltymyz bar. Bizdi keıde mundaı ádetter kópshilikten ereksheleıtin bolsa, keıde ersi kórsetýi de múmkin. İİ Elızaveta patshaıymnyń da elden erekshelep turatyn ádetteri bar. Qamshy.kz aqparat agenttigi 66 jyl Ulybrıtanıany bılep, el basqarý isinde rekord jańartqan áıgili patshaıym ustanatyn erekshe erejelerdi oqyrman nazaryna usynady.
Sapar kezinde patshaıym qany quıylǵan qaltashany únemi alyp júredi
Ol saparǵa nemese saıahatqa shyqqanda árdaıym óziniń qany quıylǵan arnaıy qaltashany alyp júredi. Patshaıym – Brıtan monarhtarynyń ishindegi eń kóp saıahattaǵan bıleýshi. Sondyqtan ol kez kelgen qaýipti jaǵdaılarǵa daıyn bolýy kerek. Onyń janynda mindetti túrde arnaıy dáriger júredi. Qandaı da bir qaýipti jaǵdaı oryn alatyn bolsa dáriger qan quıylǵan qaltasha men arnaıy dári qobdıshasyn paıdala otyra, alǵashqy kómekti der kezinde kórsetedi.
Patshaıym Býkıngem saraıynyń terezesin ashýǵa ruqsat bermeıdi
Munyń da óz sebebi bar. II Elızaveta saraıdyń halyq kóretin beti árdaıym minsiz bolýy tıis dep sanaıdy. Tek belgilengen ýaqyt aralyǵynda ǵana terezelerdi ashýǵa ruqsat etilgen.
İİ Elızaveta patshaıym muz kesekterin jek kóredi
Oǵan sýsyndar quıylǵan ydysqa tıgendegi muz kesekteriniń daýysy múlde unamaıtyn kórinedi. Patshaıym muz dóńgelek nemese shar tárizdi pishinde bolǵanyn qalaıdy. Sebebi, onyń shynyǵa tıgendegi dybysy ádemirek ári sazdy estiledi eken. Tipti, onyń jubaıy hanzada Fılıpp domalaq pishinde muz qatyratyn arnaıy apparat ta oılap tapqan desedi.
Patshaıymnyń sómkesi arqyly neni bilýge bolady?
Elızaveta patshaıymnyń sómkesiniń ózi arnaıy qyzmet atqarady. Ol sómkeniń ishine qarapaıym áıelder sıaqty ámıan, boıaý men qaǵaz-qalam emes, arnaıy ilmek salyp júredi. Patshaıym ártúrli jıyndarǵa barǵanda sómkesin janynan tastamaıtynyn jıi baıqaýǵa bolady.
Eger patshaıym sómkesin ústel ústine qoısa, kezdesý 5 mınýttan keıin aıaqtalady degendi bildiredi. Al patshaıym kezdesý qyzyqsyz ótip jatsa, sómkeni jerge qoıyp bilgi bergen. Eger patshaıymnyń ózi alyp júretin ilgekke sómkesin ilgenin baıqasańyz qýana berińiz, óıtkeni sizben kezdesý qyzyq ótip jatyr ári patshaıymnyń jaǵdaıy jaqsy.
Patshaıym rettik nómirli kıim kıedi
Patshaıym kıetin kıimderiniń rettik nómiri bar. Sol arqyly arnaıy jýrnalǵa kıimderdiń qaıda jáne qashan kıilgeni týraly esep jazylyp otyrady. Biraq, bul İİ Elızavetanyń óz kıimderin tek bir-aq ret kıedi degendi bildirmeıdi. Ol kıimderin qaıta óńdeýge, jańartýǵa berip turady.
Patshaıym kartop pen sorpa ishpeıdi
Sebebi oǵan krahmal ónimderin tutynýǵa tyıym salynǵan. Biraq, otbasy músheleriniń arasynda bul taǵamdy unatatyndar úshin aspazdar jeke keshki as daıyndaıdy. Alaıda patshaıym tátti bálish pen ystyq shaıdy jaqsy kóredi.
II Elızavetadan buryn aıaq kıimin qyzmetshisi kıedi
Jańa aıaq kıimderdiń jaısyzdyq týdyratynyn kóptegen hanymdar biletin shyǵar. Patshaıym úshin jańa týflıin biraz ýaqyt kıip, aıaqqa jaısyzdyq týdyratyn bólikterin «jumsartyp» beredi eken.
30 jyl boıy bir ǵana tyrnaq boıaýyn qoldanǵan
İİ Elızaveta tek el bıleýde ǵana emes, tyrnaq boıaýyn qoldanýda da rekord ornatqan bolar. Sebebi, ol 1989 jyldan beri sońǵy 30 jyl ishinde tek bir tústi bir ǵana brendtiń tyrnaq boıaýyn qoldanyp keledi.
