Almaty qylmystyq ister jónindegi mamandandyrylǵan aýdanaralyq sotynda Denıs Tenniń ólimine qatysty is jalǵasyp jatyr, dep jazady Qamshy.kz aqparat agenttigi.
Búgingi ótken sot otyrysynda qylmysty jasyrdy dep aıyptalǵan Janar Tolybaeva túsinikteme berdi. Onyń ishinde 7 aılyq sábıi bar ekenin aıta keteıik.
Tolybaeva kólik ishinde áleýmettik jeli arqyly tikeleı efır kórip otyrǵandyqtan ózge kúdiktiler Nuraly Qıasov pen Arman Qudaıbergenovtiń ne jaıynda áńgimelesip otyrǵanyn estimegen. Dostarynyń aına urlamaq bolǵan teris nıetteri jaıly áıel bilmegen. Al muny túsingende qylmyskerlermen sybaılas bolmaı, basqa kóshege ketip qalýdy kózdedi.
-«Olar meni alyp ketkende, túrleri bozaryp ketken edi. Nuraly rúlde otyrdy. Qolynyń jaraqattanǵanyn baıqap qaldym. Ne bolǵanyn surap edim, olar úndemedi. «Joq, aıaǵynan jaraqat alsa, ólmeýi kerek» degen sózdi estip qaldym. Kim aıtqany esimde joq, Nuraly sekildi», - dedi Tolybaeva.
Oqıǵadan soń úsh kúdikti "Shańyraq" yqshamaýdanyndaǵy úılerine barady. Olar Qıasovtyń aǵasynyń úıinde turatyn. Aǵasy Nuralyny úıde qonbaı, kólikti alyp ketkeni úshin qamshymen sabaı bastaǵan. Al Tolybaeva páter jaldaý úshin qurbysymen kezdesýge barady, ol jerde ony Qapshaǵaıǵa qydyrýǵa shaqyrady.
-«Qapshaǵaıǵa jetken soń, Armanǵa (Qudaıbergenov) habarlastym. Ol tóbelesken jigittiń qaıtys bolǵanyn aıtty. Aýylǵa ketkisi keldi. Al men qalatynymdy aıttym, sebebi bul iske esh qatysym joq edi. Al Arman "qandaı jaǵdaı bolmasyn, endigi ekeýmiz bir-birimizdi tanymaýymyz kerek" dedi. Kelistim. Sol kúni dostarym Denıs Tenniń qaıtys bolǵanyn aıtty. Áleýmettik jeliden kúdiktilerdiń izdestirilip jatqanyn oqydym, qaza tapqan jigittiń Ten ekenin sonda túsindim», - dedi ol.
20 shildede Tolybaeva kıimderin jınastyryp jatqanda belgisiz bireýlerdiń úıge kirip, Nuraly men Armandy surastyryp júrgenin kórgen.
-«Men telefonymdy qýattaǵyshqa qoıyp, Armanǵa habarlasyp, mán-jaıdan habardar ma, joq pa ekenin bilgim keldi. Ol tutqany kóterdi. Habardar eken. «Nuralynyń ustalǵanyn estidim. Men qaladan ketip baramyn, múmkindik bolǵanda habarlasamyn» dedi de qoıa saldy. Qaıda, qashan ketetinin aıtpady. Qaıta habarlasqanymda, telefony sóndirýli boldy», - dedi kúdikti.
Nuralynyń aǵasy Janar men qurbysyn jańa páterge apardy.
-«Men Rozybaqıev-Rysqulov kóshelerinen joldan ótip bara jatqanymda, meni polıseıler ustady. Qurbym ekeýmizdi kólikke otyrǵyzyp, alyp ketti. Denıs Tenniń ólgenin aıtyp, qaısysymyz Janar ekenimizdi surady. Keıin İİD ǵımaratyna tergeýge alyp keldi», - dedi.
Eki kún boıy polısıa Arman Qudaıbergenovti izdegen. Al Tolybaevaǵa Armannyń qaıda jasyrynǵanyn biletinin jáne aıtýyn talap etti.
-«Men polıseılerge kómektesetinimdi aıtyp, buryn turǵan mekenjaılarǵa aparmaq boldym. Kólikke otyrǵanymyzda Arman habarlasyp qaldy. Polıseıler sol arqyly Armannyń qaıda ekenin anyqtady. Tóle bı-Saınǵa bardyq, sol jerden Armandy ustady», - dep kúdikti bolǵan jaıtty esine túsirdi.
Al Nuraly Qıasovty týystary arqyly tapqan eken.
«Armandy ustaǵanda, men kólikte otyrdym. Janymda İİD ókilderi boldy. 20 shildeniń kezi edi. Sol kúni birinshi ret men kýáger retinde shaqyrǵan. Keıin 21 shilde qaıta shaqyrtyp, qujatqa qol qoıýymdy surady. Sodan beri jibermedi. Aldymen tergeý bólimi basshysynyń orynbasary Ǵazız Áýkenulyna apardy. «Taǵy alyp-qosaryń bar ma?» dep surady, joq dedim», - dep sózin jalǵady Tolybaeva.
«Sol kezde maǵan qysym kórsete bastady: «Kim-kimdi pyshaqtady, sen bárin kórdiń. Arman aıtyp berdi», — dedi. Sóıtip birneshe aq qaǵazdardy alyp, meni ura bastady. Eshteńe kórmegenimdi aıttym, alaıda senbedi, urýdy jalǵastyrdy. Sóıtip tergeýshige apardy. Men taǵy eshteńe kórmegenimdi aıttym. Tek sómkede pyshaqtyń bolǵanyn kórip edim, al sómke Nuralynyń qolynda boldy», - dedi Tolybaeva.
«21 shildede meni ustap, arnaıy páterge apardy. Onda barmas buryn, uryp-soǵý týraly anyqtama bolýy tıis edi. Alaıda iste ol joq. Tergeý bólimine aparǵanda soqqydan keıingi jaraqattardyń izi de qalmady», - dedi áıel.
Sotaldy tergeý barysynda Janar Tolybaeva qysym kórgeni jaıynda aıtpaǵan. Keıin kúdikti kinásin moıyndaǵandaı boldy.
«Qylmysty kórdim dep aıta almaımyn. Tek aınanyń urlanyp jatqanyn kórdim. Bul jaıynda aıtpap edim, endi moıyndaımyn», - dedi Janar Tolybaeva.
Buǵan qosa ol sot zalynda qazaqstandyqtardan jáne Denıstiń keshirim surady.
Denısti pyshaqtaǵan dep aıyptalǵan Nuraly Qıasov densaýlyǵynyń syr bildirgenin aıtyp, sotty dúısenbige aýystyrýdy ótingen. Alaıda sýdıa sottyń buǵan deıin de keıinge qaldyrylǵanyn eskerip, sot otyrysyn báribir ótkizdi. Budan soń Qıasov túsinikteme berýden bas tartty. Medısına qyzmetkerleri Qıasovtyń densaýlyǵynda rasynda aqaý bar ekenin, alaıda túsinikteme bere almaıtyndaı jaǵdaı emes ekenin aıtty.
Budan buryn túsinikteme Arman Qudaıbergenov sportshyny óltirgisi kelmegenin aıtyp, barsha qazaqstandyqtan keshirim suraǵan.
2019 jyldyń 3 qańtaryndaǵy sot otyrysynda úsh kúdikti de kinálaryn moıyndamaıtynyn aıtty.
Aıta keteıik, Denıs Ten 2018 jyldyń 19 shildesinde avto urylardyń qolynan qaza tapqan.
