Sheteldegi qandastarymyz qazaqstandyq aqparatpen qamtamasyz etiletin boldy dep jazady Qamshy.kz aqparat agenttigi. Bul týraly Dáýren Abaev óziniń feısbýk paraqshasy arqyly habarlady. 

"Dúnıejúzi qazaqtarynyń V quryltaıy aıasynda, bizdiń mınıstrlikke naqty tapsyrma bergen Elbasy: «shettegi qandastardyń Qazaqstannan jan-jaqty habar alyp turýyna kómektesý kerek», - degen bolatyn. Iaǵnı sheteldegi aǵaıyndy otandyq aqparatpen qamtamasyz etý mindeti alǵa qoıyldy. 
Jaqynda ǵana «Habar 24» pen «Kazak tv» arnalary Reseıde habar taratý lısenzıasyna qol jetkizdi. Kórshi eldiń telenaryǵyna resmı tirkelý úshin qajetti tehnıkalyq jáne qujattyq talaptardyń qyrýar sharýasy atqaryldy. Birneshe aıǵa sozylǵan, kóptegen kelissózderdiń nátejıesinde biz Reseı Federasıasynyń kabeldik operatorymen bir mámilege keldik. «Habar» agenttiginiń ujymyna, osyndaı aýqymdy isti júzege asyrǵandary úshin alǵys aıtqym keledi. 
Shekaralas aımaqtardy mekendeıtin qandastarymyz, biraz ýaqyttan beri bizdiń mınıstrlikke hat joldap, el jańalyqtaryn kórgileri keletinin jetkizip edi. Alystaǵy aǵaıynnyń ótinishi de oryndalyp otyr.
Taǵy bir aıta keterlik jańalyq. Qazir «Habar» agenttigi túsirgen «Ana júregi» atty telehıkaıa Ózbekstannyń belgili arnalarynyń birinde kórsetilip jatyr. Ózbek telekompanıasynyń ókilderi serıaldyń jergilikti kórermen tarapynan joǵary suranysqa ıe bolyp otyrǵanyn aıtady.  Osy baǵyttaǵy jumystar áli de jalǵasa beredi",— deıdi Dáýren Abaev.