Mánerlep syrǵanaýshy Denıs Tenniń ólimi týraly qorytyndyny jazǵan sot-medısınalyq sarapshy Almatyda juma kúni ótip jatqan basty sot talqylaýynda sóz sóıledi, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp.
Sarapshy Ázız Ibrahımovtyń aıtýynsha, sportshy pyshaq jaraqatynan kóp qan joǵaltýdyń saldarynan kóz jumǵan.
"Saraptama barysynda Denıs Tenniń eki pyshaq jaraqatyn alǵany belgili boldy. Mıy isip, ishki organdarynyń qanazdyǵyna ushyraǵan. 17:00-de kóz jumǵany tirkelgen", — dep málimet berdi Ibrahımov.
"Mundaı jaraqat alǵan adamnyń tiri qalýy múmkin be?" degen advokattyń suraǵyna sarapshy "joq dep naqty aıta almaımyn, ár adamnyń aǵzasy ártúrli" dep jaýap berdi.
"Keı jaǵdaıda adam alǵashqy mınýtta shok alýy múmkin. Jábirlenýshiniń basynan ótken jaǵdaıdy alsaq, jaraqaty saldarynan tez qan joǵaltqan", — dedi Ibrahımov.
Sotta medısınalyq-krımınaldyq saraptama júrgizgen maman Artem Kýrbangalıev jaýap berdi. Sarapshynyń aıtýynsha, ol mánerlep syrǵanaýshynyń kıimderi men teri bólikterin qaraǵan eken.
"Eki pyshaq jaraqatyn alǵan, biriniń uzyndyǵy 9 santımetr, ekinshisi – 4 santımetr", — dep málimet berdi Kýrbangalıev. Alaıda maman kúdiktilerdiń Denıs Tenge qalaı pyshaq salǵany týraly naqty aıta almady.
-"Denıs Tenniń jaraqatyna qaraǵanda adam artynan nemese oń jaǵynan pyshaq salǵan bolsa kerek. Alaıda meniń paıymdaýymsha, aldyńǵy jaǵynan mundaı pyshaq jaraqatyn tek solaqaı adam ǵana jasaı alady. Al art jaǵynan ońqaı adam pyshaq salǵan bolýy múmkin", — dep atap ótti Kýrbangalıev.
Juma kúni 11 qańtarda Almaty qylmystyq ister boıynsha mamandandyrylǵan aýdanaralyq sotynda tanymal mánerlep syrǵanaýshy Denıs Tenniń ólimine qatysty basty sot talqylaýy ótip jatyr. 38 tomnan turatyn qylmystyq is 13 jeltoqsanda sotqa jetken. Sottalýshylar – Arman Qudaıbergenov, Nuraly Qıasov jáne Janar Tolybaeva. "Qudaıbergenov pen Qıasov kisi óltirdi" dep aıyptalsa, Tolybaevaǵa qylmys týraly habarlamaǵany úshin aıyp taǵylǵan.
Sot otyrysy barysynda oqıǵa týraly jańa derekter anyqtalýda. Úsh kúdikti de kinásin moıyndamaıdy. Jábirlenýshi tarap Denıs Tenniń tapsyryspen óltirilgenin alǵa tartady.
Denıs Tenniń ólimi
Denıs Ten 25 jasynda kólik urylarynyń qolynan ajal qushty. 2018 jyldyń 19 shildesinde Denıs Lexus kóligin Almaty ortalyǵynda turaqqa qoıyp, meıramhanaǵa kiredi. Shyqqan kezde kóliginiń aınasyn urlap jatqan eki jigitti kórip, olarmen qaqtyǵysqa túsken. Urylardyń biri sportshynyń aıaǵyna pyshaq suǵyp jiberedi. Eki saǵattan soń Denıs Ten kóp qan joǵaltý saldarynan aýrýhanada kóz jumdy.
