Búgin, qańtardyń 12-si Almatyda sovet zamanynda Qazaqstandy uzaq jyl basqarǵan Dinmuhamed Qonaevty eske alý sharasy ótti dep jazady Qamshy.kz aqparat agenttigi Azattyqtyń deregin negizge alyp. Onyń týǵan kúnine oraı Qonaev mýzeıi uıymdastyrǵan sharaǵa júzge jýyq adam qatysyp, Serikbolsyn Ábdildın, Sháńgereı Jánibekov sekildi Qazaqstandy Qonaev basqarǵan kezde joǵary qyzmetterde bolǵandar keldi.
Almaty qalasy mýzeıler birlestigi dırektorynyń orynbasary Qaırat Tarbaev Almaty ákimdiginiń ókili retinde jıynǵa qatysqan.
Búgingi jıynǵa kelgenderdiń bir shoǵyry aldymen Keńsaı zıratyndaǵy Qonaev qabirine barǵan. Gúl qoıý rásiminen keıin Qonaev turǵan páterde estelik fılm kórsetiledi, - dedi Elena Qubasheva Azattyq tilshisine.
Dinmuhamed Qonaev sovettik Qazaqstan bıliginde shırek ǵasyr qyzmet etti. 1960-1986 jyldar aralyǵynda Qazaqstan kompartıasynyń birinshi hatshysy boldy. 1986 jyly Jeltoqsan oqıǵasynan keıin qysymǵa alynyp, kópshilikpen aralasýyna birshama shekteý qoıyldy.
1987 jyly maýsym aıynda «Qazaqstan Kompartıasy Ortalyq komıtetiniń birinshi hatshysy bolǵanda respýblıka partıa uıymyn basqarýdaǵy jibergen qatelikteri úshin» degen aıyppen Qazaqstan kompartıasynyń ortalyq komıtetine múshelikten shyǵaryldy.
Dinmuhamed Qonaev ómiriniń sońyna qaraı halyqpen erkin aralasty, «Ótti dáýren osylaı», «Aqıqattan attaýǵa bolmaıdy» dep atalatyn estelik jınaqtar qaldyrdy.
