Aqtóbe oblysynda "oramal daýyna" baılanysty balalary mektepke barmaı otyrǵan eki ata-anaǵa 12625 teńgeden (bes aılyq eseptik kórsetkish nemese AEK) aıyppul salyndy. Olardyń balalary Aqtóbe qalasyndaǵy №8 jáne №60 mektepte oqıdy dep jazady Qamshy.kz aqparat agenttigi Azattyqtyń deregin negizge alyp.  Bul týraly Aqtóbe oblysynyń bilim salasyndaǵy baqylaý departamentiniń bólim basshysy Janar Muhambetalına aıtty.

— Taǵy eki ata-anaǵa bes AEK-ke teń aıyppul salyndy. Olar Ákimshilik quqyq buzýshylyq kodeksiniń 409-babynyń 2-tarmaǵynda kórsetilgen ("Ata-analardyń nemese ózge de zańdy ókilderdiń bilim berý zańnamasynda kózdelgen mindetterdi oryndamaýy nemese tıisinshe oryndamaýy") talapty buzdy dep aıyptalyp otyr, - deıdi Janar Muhambetalına.

Aqtóbe oblystyq bilim basqarmasynyń dereginshe, qazir oblys aýmaǵynda "mektep formasyn buzǵandyqtan" sabaqqa qatysa almaı otyrǵan 10 bala bar. Olar eki toqsan boıy sabaqqa kelmegen. Bilim departamenti bul balalardyń ata-analarymen túrli túsindirý jumystaryn byltyrdan júrgizip keledi.

Aqtóbe oblysynyń bilim salasyndaǵy baqylaý departamenti 2018 jyly "oramal daýyna" oraı jalpy sany 33 ata-anaǵa aıyppul salǵan. Bıyl bul sanatqa taǵy eki ata qosyldy. Ákimshilik shara qoldanylǵandardyń segizi — Aqtóbedegi №31 mekteptiń ata-analary.

№31 mekteptiń burynǵy dırektory Sáýle Baımaǵambetova "oramal daýynan ábden qajyp, qyzmetinen ketýge májbúr bolǵanyn" aıtady. Sáýle Baımaǵambetova qazir ózi basqarǵan mektepte fızıka páninen sabaq berip júr. Bul mekteptiń oramal tartatyn alty oqýshysy qyrkúıekten beri mektepke kelmegen.

Buǵan deıin Aqtóbe qalalyq soty oramal daýyna baılanysty qaladaǵy ondaǵan mektep dırektorynyń ústinen ata-analar túsirgen shaǵymyn qanaǵattandyrmaǵan. Ata-analar oramal tartatyn qyzdaryn mektepke kirgizbegen mektep dırektorynyń is-áreketin zańsyz dep tanýdy suraǵan.