Keıde áleýmettik jelige salǵan fotosýretterdi aqtarystyryp otyryp, biz olardyń ózindik energetıkasy bolatynyn, ómirimizge áserin tıgizip, densaýlyǵymyzdy nyǵaıtatynyn nemese jasartatynyn sezine bermeımiz. Al parapsıhologtar adam sýretiniń qupıa kúshin baıaǵydan biledi.
Adam men fotosýrettiń qandaı baılanysy bar deısiz be?
Adamdar kóne zamannan ózderi men sýretiniń magıalyq baılanysy baryna senip kelgen. Oǵan halyq emshileri men baqsy-balgerlerdiń sýretke qarap pal ashýy, adamnyń tiri nemese óli ekenin sýretine qarap ajyratýy jáne sýreti arqyly emdeýi men dýa jasaýy dálel bola alady.
HIH ǵasyrdyń ortasynda fotografıa paıda bolǵan kezde, tylsym kúshke ıe adamdar jurtqa alys qashyqtyqtan áser etýdiń keremet múmkindigine ıe bolǵandaryn oılamaǵan-dy. Ýaqyt óte kele, kózboıaýshylar men sıqyrshylar fotosýrettiń qupıa kúshine ábden qanyǵyp, odan alǵan aqparat arqyly jaǵymsyz isterin erkin júzege asyra bastaıdy. Qazir oqymystylar fotobeınede bizdiń syrtqy túrimiz ǵana emes, bıoenergetıkamyz da qattalyp qalatynyn anyq dáleldep shyqty.
Kez kelgen foto arqyly onda beınelengen adamnyń óli nemese tiri ekenin ǵana emes, qandaı syrqatpen aýyratynyn da bilýge bolady. Ásirese týra qarap janaryn keń ashyp túsken portretter aqparat alý úshin óte qolaıly. Adamǵa sýreti arqyly jaqsylyq jasap, kóńilin jadyratyp, energetıkasyn kóterýge, aýrýynan jazýǵa nemese kerisinshe jamandyq jasap, ol adamdy kóz ben sóz tıgizý arqyly naýqasqa shaldyqtyrýǵa, tipti ajalǵa aıdap salýǵa da bolatyn kórinedi.
Sýreti arqyly tek qana adamǵa emes, kez kelgen jandy nársege, tipti ósimdikke deıin áser etýge bolady. Máselen, osyndaı bir áýesqoı tájirıbe jumyrtqany jańa jaryp shyqqan balapandarǵa júrgizilgen. Iaǵnı dene qurylysy birdeı tórt balapannyń birin sýretke tartyp, ol sýretti kóbeıtý arqyly birneshe adamǵa taratqan. Sóıtip, olarǵa qaıǵyrǵanda nemese aýyrǵanda álgi balapannyń sýretine qadalyp, oısha odan kúsh alýdy, ıaǵnı balapannyń qýatyn qalaı da tartyp alýdy oılaýdy usynǵan. Nátıjesinde úsh balapan kádimgideı ósip jetilgen de, fotomodelge paıdalanylǵan tórtinshisi ósip-jetilýdiń ornyna, tym áljýaz kúıge túsken. Tipti ólip qalatyn bolǵan soń, arnaıy kútip-baǵýǵa týra kelipti.
Sondyqtan da tek óz sýretterińizge ǵana emes, otbasy men baýyrlaryńyz, týysqandaryńyz ben dostaryńyz jáne tanystaryńyzdyń da sýretterine uqyptylyqpen qarańyz. Parapsıhologtar men bıoenergetıkter sýrettiń adamnyń taǵdyry men densaýlyǵyna áserin zertteý arqyly fotografıamen jumys isteýdiń tehnıkalyq qaýipsizdigin jasaqtap shyqqan. Olardyń birazy tómendegishe:
- Óz sýretińizdi áleýmettik jelide qalaı bolsa solaı tarata bermeńiz, ásirese tanymaıtyn nemese ózińizge kózqarasy nashar adamdarǵa bermegenińiz durys.
- Qaıtys bolǵan adamdardyń, ákeńizdiń nemese shesheńizdiń bolsyn, sýretterin uıyqtaıtyn nemese as ishetin áıtpese ýaqytyńyzdy kóp ótkizetin bólmede qabyrǵaǵa ilmegenińiz, ashyq ustamaǵanyńyz durys.
- Bóten bireýdiń sýretine óshikpeńiz: jyrtpańyz, kespeńiz, syzǵylamańyz, t.b. Qazir óshikken adamyńyzben keıin qarym-qatynasyńyz túzelýi múmkin, sol kezde fotosy arqyly jibergen jaman energıańyzdy qaıtaryp ala almaısyz.
- Júrip júrgen qyz ben jigitke nekeleskenge deıin sýretke kóp túsýge bolmaıdy. Ázirge belgisiz sebepke baılanysty mundaı «fotohronıkalar» eki jastyń bas qosýyna kedergi keltirip, aıyrylysyp ketýlerine soqtyrady.
- Qaıtys bolǵan adamdardy sýretke tartpaǵan durys. Keıbir parapsıhologtar bul áreket marqumnyń rýhyn mazalaıtynyn aıtady.
- Energetıkalyq vampırlermen birge sýretke túspeńiz. Kúshińizden aıyrylasyz.
- Jaman aýrýdan nemese aýyr syrqattan qaıtys bolǵan adamdardyń sýretin bólek álbomǵa jınańyz, tiri adam men ólgen adamnyń, sondaı-aq aýrý men saý adamnyń sýretin qatar qoımańyz.
- Múmkindiginshe álbomyńyzǵa qabir, zırattardyń, qylmyskerler men esi aýysqandardyń, nashaqor-maskúnemderdiń sýretterin ilmeýge tyrysyńyz.
Dúnıeden ozǵan kisiniń portretin ilip qoıýdy sharıǵat ta buıyrmaıdy. Tek estelik úshin álbomnyń arasyna salyp qoıyp, saǵynǵanda eske alyp, qarap turýǵa bolady. Negizi moldalar jandy zattyń sýreti turǵan jerge perishte kirmeıdi deıdi. Sol sekildi qabirdiń basyna eskertkish qoıǵanda da kisiniń sýretin ilip qoıý durys amal emes ekenin aıtady.
Ǵylym áli de fotografıanyń barlyq qupıalary men múmkindikterin bilmeıdi. Tipti keıbir málimetter boıynsha ushaqtyń, avtokóliktiń nemese ǵımarattyń arnaıy túsirilgen elektromagnıttik fotosy arqyly onyń bolashaqta apatqa ushyraıtynyn nemese qıraıtynyn da qara belgiden turatyn energıasy arqyly bilýge bolatyn kórinedi. Máselen, «Kolýmbıa» ǵarysh kemesi apatqa ushyraýdan bir aı buryn barlyq segiz astronavtyń aýrasynda álgindeı jamandyq belgisi baıqalǵan. Biraq bul eskertýge amerıkalyq ǵalymdar pálendeı nazar aýdarmaǵan, aıaǵy qalaı bolǵany kópke belgili.
Keıde keıbir nárselerdiń, máselen, NLO-nyń (ushatyn tabaqsha) fotoplenkaǵa tartylmaıtyny belgili. Al keıde keıbir sýretterde jaı kózge kórinbeıtin túsiniksiz bir belgiler tańbalanyp qalady. Máselen, Pavlodardaǵy Máshhúr Júsip meshitin sýretke tartqanda, álgindeı tańǵalarlyq erekshe belgi kóringen
Sonymen, joǵarydaǵydaı qubylystardyń adam taǵdyryna áser etken oqıǵalaryn tize bersek, talaı mysaldy tabýǵa bolady. Al oǵan sený-senbeý óz erkińizde.
