Elimizge belgili zańger Abzal Quspan ánshi Gaýhar Álimbekovany qorǵaýǵa nıet bildirip otyr, dep jazady Qamshy.kz aqparat agenttigi. Sáýle Ábildahanqyzy bul jaıynda óziniń Facebook paraqshasynda jazyp, Gaýhar Álimbekovanyń ónerin tilge tıek etti.

"Halyqtyń súıikti ánshisi, belgili kompozıtor Gaýhar Álimbekovany bilmeıtin qazaq kemde-kem...
Gaýhardyń ánderinsiz qazaqtyń toıy ótpegen...
Toı jasaǵan, toı kórgen árqaısysyńyz (tipti ony sottaǵan sol sottyń ózi de bálkim!..) Gaýhardyń ánimen kelin túsirip, Gaýhardyń ánimen qyz uzattyńyzdar...
Qazaq ónerine, qazaq mádenıetine orasan zor eńbek sińirgen Gaýhardaı talantynyń eńbegin baǵalap, Qazaqstan úkimeti qashan bir japyraq ataq nemese basyna baspana berdi? Ittiń ıtaqaıyna berip (satyp, úlestirip) jatqan QR Eńbek sińirgen qaıratkeri degendi alsa, osy Gýhar alýy kerek edi ǵoı...
Bizdiń úkimet Gaýhardyń orny túrme dep sheshti..." - deıdi jýrnalıs Sáýle Ábildahanqyzy.

Ánshiniń basyna qara bult úıirilgenin jáne bul jaǵdaıǵa beıjaı qarap otyra almaıtynyna nıet bildire otyryp, zańger Abzal Quspanmen osy másele tóńireginde sóz qozǵaǵanyn aıtady.

Advokat Abzal Quspan óz kezeginde bylaı dep jaýap beripti:

– "Jalpy, otbasymda bolǵan sońǵy jaǵdaılarǵa baılanysty kóp isten bas tartyp júrgenimdi bilesiń... tipti, Almatydaǵy, Astanadaǵy biraz jekelegen isterden bas tartyp, aqshalaryn qaıtaryp berip, basqa advokat taýyp berip, tynysh qana úıde jatqanmyn... biraz ýaqyt taım-aýt alyp, qyzymnyń jylyn bergenshe kóp iske kirispeımin, otbasymnyń janynda kóbirek bolamyn dep oılaǵan edim. Biraq myna jaǵdaı basqa jaǵdaı... Gaýhar Álimbekova – bárimizdiń súıikti ánshimiz. Gaýhardaı eline eren eńbegi sińgen talantty arýymyzdyń basyna is túsip jatqanda, ári ózińniń ótinishińdi aıaqasty etkendeı bolmaıyn dep, osy iske aralasqym kelip otyr. Buǵan taǵy mynadaı birneshe sebep bar:
Birinshiden: Jalpy, túrme degen ne úshin salynady? Túrme degen – qoǵamǵa qaýipti adamdardy oqshaýlaý úshin, basqa adamdarǵa zıany tımeý úshin, qoǵamnan alastaý úshin salynady. Boldy! Túrmeniń basqa fýnksıasy joq! Iaǵnı, adam óltirgen, bala zorlaǵan, áıel zorlaǵan, urlyq jasaǵan, kisi tonaǵan... qysqasy túrme – qoǵamǵa qaýipti, adamdardyń ómirine, densaýlyǵyna qaýip keltiretin qanisher, zorlyqshy, adamdardy qoǵamnan alys ustaý úshin salynady. Uryny qansha jerden sen tyıamyn deseń de, ol báribir urlyǵyn qoımaıdy. Urlyq – psıhologıalyq aýrýdyń bir túri dep esepteıdi ǵalymdar... Kisi óltirgen qanisherler, zorlyqshylar ekinshi ret taǵy kisi óltirýi, zorlaýy ábden múmkin... Sóz joq, olardy qoǵamnan alastaý kerek...
Al endi Gaýhar Álimbekova kim? Ol búkil qazaq eline tanymal tulǵa, belgili ánshi, talantty kompozıtor. Dál sol Gaýhar bizdiń qoǵamǵa sonshalyqty qaýipti adam ba? Ony osynshama 6 jylǵa bas bostandyǵynan aıyratyndaı ne kún týdy? Bul degen óte aýyr jaza! 
Bul sózime qarap basqalar oı túıip qalmasyn, «e, ol kináli eken, másele tek jazasynyń aýyrlyǵynda eken» dep. Joq. Onyń kináli-kinásiz ekendigin men ázirge tap basyp aıta almaımyn. Men áli ispen tanyspaǵandyqtyn, istiń mán-jaıyn bilmegendikten, ázirge osylaı aıtyp otyrmyn. Biraq oǵan berilgen jaza ÓTE AÝYR jaza jáne ÁDİLETSİZ jaza ekendigin basa aıtqym keledi. Bul kózge uryp tur. 
Alysqa barmaı-aq qoıalyq, NIdi aıtaıyq: 1 mln dollar para alyp jatqan jerinde ustalady, oǵan jaza taǵaıyndamaq túgili, isin qysqartyp tastaıdy. Men biletin basqa da kóptegen ister bar, onyń bárin de ýaqyty kelgen kezde kórsetemin – qandaı jaǵdaıda bizdiń sýdıalar qandaı jaza taǵaıyndady – nebir óte aýyr qylmystar boıynsha óte jeńil jazalar taǵaıyndap keldi, túkke turǵysyz osyndaı usaq-túıek, jeńil azamattyq ister boıynsha aýyr jazalar taǵaıyndaǵan ister óte kóp. Sonda sol isterdiń basy-qasynda júrgen bizdiń tergeýshilerdiń, prokýrorlardyń, sýdıalardyń maqsaty ne? 
Dál Gaýharǵa kelgende mundaı jaza taǵaıyndaý kimge, ne úshin kerek boldy? Týra halyqtyń ádeıi ashý-yzasyn týdyrǵysy kelgendeı oı qaldyrady. Basqa joly joqtaı, birden áı-shaıǵa qaramastan, 6 jyl bas bostandyǵynan aıyrady...
Taǵy qaıtalap aıtamyn, bir nárse anyq – Gaýhar qoǵamǵa qaýipti adam emes! Oǵan 6 jyl bas bostandyǵynan aıyratyndaı eshqandaı qajettilik joq edi. Taǵaıyndalǵan jaza óte ádiletsiz dep sanaımyn.
Ekinshiden, bizde ábden tájirıbege engen másele bar, ol – bir adamnyń aryzymen «alaıaqtyq» babymen is qozǵaý óte qıyn jáne kóp jaǵdaıda – 99,9 % múmkin emes! Mundaı ister negizinen, azamattyq-quqyqtyq qarym-qatynas negizinde «aqsha berdiń be, óndirip al» dep keri qaıtarylady. Dál Gaýharǵa bilekterin túrinip kiriskenderi meni tańǵaldyryp otyr... 
Úshinshiden, bul, sóz joq, halyqtyń ashý-yzasyn týdyratyn nárse. Mysaly, Reseıde, Alla pýgacheva demeı-aq qoıaıyq, kez-kelgen ortasha ánshiniń basynda osyndaı jaǵdaı bolýy múmkin be? Múmkin emes. Óıtkeni olarda ult degen uǵym bar, ult namysy, ult maqtanyshy degen uǵym birinshi orynda turady. Ulttyq ónerge, ulttyq mádneıetke qatysy bar adamdaryn olar munshalyqty qorlamaıdy. Al bizde nege qazaqqa ǵana qadirli, qazaqqa ǵana syıly adamdardyń basynan árkez osylaı bult aıyrylmaıdy? Mysaly, Tuńǵyshbaı Jamanqulovty alyp qaraıyq. Qandaı adam edi? Búkil halyqtyń mahabbatyna, qurmetine ıe bolǵan adam edi! Osyndaı ult maqtanyshtaryn biz op-ońaı túrmege qamap, op-ońaı sottap, halyqtyń pikirine pysqylyp ta qaramastan, halyqtyń aldyndaǵy bedelin op-ońaı taptaı salamyz. Bul bizdiń sot júıesiniń qoǵam pikirimen, qoǵam oıymen sanaspaıtyndyǵyn kórsetedi. Nege qoǵammen sanasý kerek deıtin suraqqa keletin bolsaq, bul zańgerler arasynda áldeqashan belgili: sózimniń basyndaı aıttym ǵoı - qaýipti adamdardy qoǵamnan alshaqtatady. Iaǵnı, qylmystyq is degen – qoǵamnyń múddesin qorǵaý úshin, qoǵamǵa qaýipti adamdardy qoǵamnan alastaý úshin qozǵalady. Sondyqtan qoǵamnyń pikiri bul jerde rol oınaý kerek, eskerilý kerek. Biz osyny eskerýdi umytyp baramyz. Bul óte ókinishti. Ia bolmasa, bizdiń bılik qazaq degen qoǵamnyń bar ekenin bilmeıdi, bilse de, bilmegensıdi, kórmegensıdi, ıa bolmasa, qazaqty kózge ilýge turmaıtyn qoǵam dep esepteıdi. Qazaq – QR Konstıtýsıasy booıynsha – memleket quraýshy ult. Osy jerdiń, eldiń ıesimiz. Osylaı ekenin bile tura, ádeıi qazaqtyń shabyna túrtip, ashý-yzasyn týdyrǵysy keledi. Bul – jalǵyz Gaýharǵa qatysty emes, jalpy aıtyp otyrǵan másele.
Eger Gaýhar ózi senim bildirip, osy ispen aınalysýymdy surasa, Gaýhardaı asyl qyzdarymyzdy qorǵamasaq, eldigimizge de, erligimizge de, advokattyǵyma da syn bolar".

Usynǵan: Nazerke Labıhan