Baıaǵyda Qytaıda Lı-lı atty bir qyz turmysqa shyǵypty. Birneshe aıdan keıin-aq ene men kelin arasyndaǵy aıqaı-shýdan ol úıde turý qıametke aınalady. Enesinen qaıtip qutylaryn bilmeı dal bolǵan kelin dárilik shópter jasaýmen aınalysatyn ákesiniń bir dosyna baryp, "ý jasap berińiz" dep jalynady. Qart kisi oǵan ýyty ótkir shópten jasaǵan arnaıy dárisin berip turyp, ony úsh aı boıy kún saıyn az-azdap enesi jeıtin tamaqqa qosyp berip otyrýdy tapsyrady. Qart kisi jas kelinge eshkim seziktenbeýi úshin enesine jaqsy qarap, oǵan eń tamaqtardy jasaýdy eskertedi.

       Qýana úıine kelgen Lı-lı  qart kisiniń aıtqandaryn buljytpaı oryndaýǵa kóshedi. Enesiniń tamaǵyna az-azdap ý qosyp júredi. "Eshkim munymdy bilip qoımasyn" dep, enesin qatty syılap-qurmetteı bastaıdy. Ózine anasyndaı qarap, syılap, qurmet kórsetip júrgen kelinine jónsiz urysyp, tyrnaq astynan kir izdep júrgen enesi de óz áreketiniń durys emestigine kózi jetip, kelinine basqasha kózqaraspen qarap, súısine bastaıdy.

        Kóp ótpeı-aq úıde tynyshtyq ornap, januıa músheleri bir-birimen tatý-tátti turyp ketipti. Jas kelin enesine óz qolymen ý berip kelgenine endi ókine bastaıdy. Ýdy enesiniń qanynan qaıta tazalatqysy keledi. Óıtkeni, jaqsy kórip ketken enesin ólimge qımaıdy. Dereý álgi shóppen aınalysatyn qartqa júgirdi. Ózine bul joly basqa ótinishpen kelip, kózin jasqa bulap otyrǵan jas kelinniń aıtqanyn estigen qart kózinen jas aqqansha kúledi. Sóıtedi de: -"Shyraǵym, Lı-lı, - dedi, - meniń saǵan bergenim ý emes, kerisinshe, dárýmender bolatyn. Sen osy úsh aı ishinde eneńniń densaýlyǵyn burynǵysynan da jaqsarttyń. Bar bolǵany, sen ony syılap, qurmettegen saıyn aralaryńdaǵy ashý seıile berdi, tatýlyq pen súıispenshilik ornady. Sen endi naǵyz aqyldy kelin boldyń!" – degen eken.

Usynǵan: Maqpal Sembaı