Qytaılyq ǵalymdar orbıtalyq elektr stansıa jasaýdy bastap ketti. Ol kún energıasyn ǵaryshtan tikeleı alyp, lazer arqyly jerge jiberedi.

Qytaı baspasóziniń málimetinshe, Chýnsın aımaǵynda eksperımentaldy bazanyń qurylysy salynýda. Alǵashqy elektr stansıany stratosfera qabatynda 2021-2025 jyldary synaqtan ótkizbekshi. Jobany «Chane-4» apparatyn aıǵa sátti qondyrǵan Kosmostyq tehnologıa akademıasy basqarady. Ol 2022 jyly óziniń kosmostyq stansıasyn salýdy josparlap otyr.

Qytaıǵaryshtyq baǵdarlamasyna osy jyly búdjetten 8 mlrd dollar bólingen. Sondaı-aq ǵaryshty ıgerý men zertteýge aýqymdy qarjy bólgen elderdiń qatarynda AQSH tur.

Qytaı ǵarysh elektr stansıasy týraly «Science and Technology Daily» gazeti jazdy. Stansıanyń taǵy bir artyqshylyǵy – energıany aýa raıyna, jyl mezgiline, ýaqytqa táýelsiz túrde  táýlik boıy beredi. Kosmostyq tehnologıa akademıasynyń qyzmetkeri Pana Chjıhao bul stansıanyń adamzat úshin sarqylmas energıa kózi bolatynyn aıtty.

Alaıda, bul úshin birneshe tehnıkalyq tapsyrmalardy oryndaý qajet. Mysaly, kosmostyq elektr stansıanyń salmaǵy shamamen 1000 tonna. Bul Halyqaralyq kosmostyq stansıadan 2,5 ese úlken. Jer betinen mundaı úlken stansıany ushyrý kóp kúsh qajet etedi. Sondyqtan ǵalymdar ony ǵaryshtyń ózinde aqyldy robottar arqyly salmaq. Taǵy tolyq sheshilmegen másele: jınalǵan elektr energıasyn jerge qalaı jetkizý kerek? Teorıalyq turǵydan lazerlik sáýle men mıkrotolqyn - eń utymdy jol.  Biraq, áýeli olardyń qandaı jaǵdaıda kúshti ári ekologıaǵa zıansyz túrde áser etetinin anyqtaý qajet.

Ótken jyly Kalıfornıa tehnologıa ınstıtýtynyń ǵalymdary analogıalyq apparattyń prototıpin jasap shyqqan bolatyn. Ol kún sáýlesin ashyq kosmostan alyp, jer betine jiberedi. Buǵan qatysty zertteýler Eýropa, Úndistan, Japonıada da jalǵasyn tabýda.

Shynádil Saltanat