Áne-mine degenshe, jurtty kók jáshik pen ıýtýbke telmirtken "Kelinjan" telehıkaıasy máresine jetti. Qazaq kınoóndirisiniń bosaǵasynan syzyla sálem berip kirgen "Kelinjan" kóptiń kóńiliniń tórine jaıǵasty. Jurt maqtaǵan telehıkaıany men de túgel kórip shyqtym. Sonymen, "Kelinjan" nege hıt boldy?
"Kelinjan" – eshkimdi aımalastyrmaı da, súıistirmeı de serıal túsirýge bolatyndyǵyn dáleldegen sońǵy ýaqytta shyqqan telehıkaıalardyń eń úzdigi. Kóbirek kórermen tartý úshin 18 + áreketterdi kórsetýge qumar prodúserlerdiń "Etekti ashpaı-aq, abyroıdy shashpaı-aq hıt týyndy shyǵarýǵa bolady eken ǵoı",– dep, aýzy ashylyp qalǵan shyǵar, sirá... Mádibek pen Valányń jasyryn "áreketiniń" bir shetin de kórsetpeı oqıǵany ári qaraı órbitip jibergenine tańdanasyń.
Akterler óte sátti tańdalǵan. Árqaısysy dál osy ról úshin týǵandaı. Quddy bir sol aýyldyń turǵyndaryn kastıngten ótkizip, tańdap alǵandaı. Árbiri róldi shyn sezinedi, shyn sendiredi. Aısaranyń qubylmaly obrazy men Balqıanyń jaǵympazdyǵy eriksiz ezýińe kúlki syılaıdy.
Ár usaq-túıegine deıin sátti uıymdastyrǵan. Aýyldyń kıiný stıli, dastarhandaǵy sháı men qant, qazan-oshaqtyń aınalasy, bári oryn-ornymen. "Myna jeri ótirik bolyp ketipti" dep átteń-aıǵa" salynatyn kadlary az.
Kórshilerdiń prototıpi de shynaıy shyqqan. Qaı úıde qonaq kelse, sol úıde júretin baıanyn kótergen ishkish kórshi de, kúıeýiniń araq qoıǵanyn tilep, táýip jaǵalaǵan aýyldaǵy nómiri birinshi ósekshi áıel de óz rólderin sátti alyp shyqty.
Keıipkerler ómirde bar. Dál osyndaı otbasynyń ómirin kórsetpese de, dál osyndaı adamdar ómirde bar. Bárimizdiń áýletimizde bir Aısara, bir Balqıa, bir Zıada, bir Zıada, ne bir Qylyshbek bar. Ony bári moıyndaıdy. Ár keıipkerden ózimizdi, ne tanysymyzdy tanydyq. Telehıkaıa bizge sol úshin maıdaı jaqty. Abysyndar arasyndaǵy taıtalas, aýyldan qashqan kelinder, enshisin alýǵa asyqqan otbasy, bári-bári bar ómirde bar adamdar.
Prodúser naǵyz aýyldan shyqqan adam. Ia, bul da telehıkaıanyń shynaıy shyǵýyna áser etedi. Qalada týyp, qalada ósken adamnyń týyndysy osynsha halyqtyń júregine jetpes edi. Óziniń ósken ólkesi men kelin bolyp túsken aýylynyń tirshiliginen kórgen-bilgenin qaǵazǵa túsirip, odan úlken telehıkaıa týdyrǵan prodúserdiń tókken teri men etken eńbegi aqtaldy degen sóz.
Kúlki de syılady, jylatty da. Úlgi kórsetip, jón silteýdi de umytpady. Astarlap otyryp tálim-tárbıe berdi. "Bul úıdiń ketken qyzy qaıtyp kelmeıdi, kelgen kelini qaıtyp ketpeıdi" degen kempirdiń bir sóziniń ózinde tereń maǵyna bar.. Talaı ónegeli sózdi Qasym shal arqyly da aıtqyzdy. Kishi kelininiń sońǵy sheshiminen de alatyn ónege bar.
Aqerke Ábilhan
