Aýyr qylmys 1995 jyldyń sáýirinde Pavlodar qalasynda jasaldy. Qaryndasyn jek kóretin 16 jastaǵy bozbala odan qutylýdyń jolyn izdep, aqyry óltirip tynady. Ekinshi qaryndasynyń muny jaıyna qaldyrmaıtynyn bilgen soń ony da óltirdi. Jalpy oqıǵa bylaı bolǵan.
Anastasıa Sýshkova ulyn nan alyp kelý úshin dúkenge jiberedi. 8 jastaǵy qaryndasy Katá da aǵasymen birge barǵysy keledi. Ne kerek, 14 jastaǵy Ira da sońdarynan erip barady. Arada bir saǵat ótedi, nan da joq, qyzdar da joq. Alaıda 16 jastaǵy Vıktor aýlada júr eken. Muny baıqaǵan anasy Vıktordan qaryndastaryn izdeýdi suraıdy. Jigit kóshege shyǵyp ketedi de, qaryndastaryn emes, úıge nan satyp ákeledi. Keshke jumystan ákeleri kelip, qyzdarynyń joǵalyp ketkenin estıdi. Úıge kirer-kirmes izdeýge kóshedi. Apaly-sińlini izdeýge polısıa da, Sýshkovolardyń kórshileri de aralasty. Biraq nátıjesiz...
Buǵan ana júregi shydar ma, óz-ózine qol jumsaýǵa deıin bardy. Aqyry muny istedi. Qyzdarynyń joǵalǵanyna birneshe kún ótken soń Nastá balshyǵa barady. Barady, biraq qaıtpaıdy... Áıeli uzaq ýaqyt bógelgendikten kúıeýi izdeýge shyǵady. Kóp qadam attap baspaı-aq er adam úı aýlasyndaǵy átkenshekke asylyp turǵan áıeliniń denesin baıqady. Qutqarmaq boldy, biraq bári kesh. Sýshkovolar otbasynan tek áke men bala qaldy.
Arada 3 jylǵa jýyq ýaqyt ótken soń Andreı Petruly qaıta úılendi.
Jazdyń bir kúninde Andreıdiń ekinshi áıeli monshany qyzdyrmaq bolyp, kúıeýinen aǵash terezeler men oryndyqtardy shyǵarýdy ótinedi. Monshany tazalap júrip Andreı edenderdi de keptirip alýdy jón kóredi. Buryn sońdy muny jıi isteıtin, alaıda bir jyl buryn uly nege ekeni belgisiz edenge plıntýs shegelep tastaǵan. Ákesi ulyna ashýlanyp júrip, edendi aqyry ashady. Ashady da bir sumdyqty kózi shalady. Eden astyndaǵy sýdyń betinde úlken qyzy Iranyń qyzyl shalbary jatyr eken. Júregi daýalaǵan áke birden polısıa shaqyrady.
Jedel tergeý tobynyń qyzmetkeleri kelip, eden astyndaǵy sýdyń túbinen adamnyń denesin alyp shyǵady. Andreı úlken qyzy Irany birden tanydy. Polısıa qyzmetkerleri sý astynan Andreıdiń ekinshi qyzynyń da denesin alyp shyqty. Bul oqıǵadan soń polıseıler dereý Vıktordy ustap, bólimshege alyp ketedi. Er jetken azamat óz qylmysyn birden moıyndady, alaıda isine múldem ókinbepti. Osylaısha Andreı otbasynan túgel aıyrylady.
Qylmys qalaı boldy?
Sáýirdiń sol qaraly keshinde Vıktor nanǵa barmaq bolyp, ózimen as úıden pyshaq alyp shyǵady. Aǵasymen birge barýdy qalaǵan qaryndasyn monshaǵa qaraı súıreıdi. Esikti jabady da qaryndasyn birneshe ret pyshaqtaıdy. Artynan ergen ekinshi qaryndasy da aǵasynyń monshaǵa bettegenin kórip, artynan júredi. Vıktor óziniń qylmysyn Iradan jasyrý úshin ony da pyshaqtap óltiredi. Sóıtip qaryndastarynyń denesin edenniń astyndaǵy sýǵa toly shuńqyrǵa tyǵady. Al pyshaqty jýyp-shaıyp, ornyna aparyp qoıady. Ári qaraı Vıktor túk bolmaǵandaı tirshiligin jalǵastyrǵan. Al munyń sebebin suraǵanda, kishkentaı qaryndasynyń kesirinen dostarymen eshqaıda shyǵa almaıtynyna, Katáǵa qarap úıde qalyp qalatynyna ashýlanǵan eken.
Sot ony birneshe jylǵa bas bostandyǵynan aıyrdy, al qazir Vıktor bostandyqta. Bir qyzyǵy jigittiń psıhıkasy qalypty, esirtki paıdalanbaǵan, ishimdik ishpegen, alaıda jaýyzdyqpen adam óltirgen.
P.S. keıipkerlerdiń esimi ózgertilgen
Vasılıı Golyshkın, sputnik.kz
