Roza Baǵlanovanyń esteliginen:

Mektep bitirgen soń Qyzylorda pedagogıka ınstıtýtyna tústim, biraq kenetten ákem qaıtys bolyp, týystardy jaǵalap, turmystyq jaǵdaıǵa oraı Tashkenttegi toqyma ınstıtýtyna aýystym. Instıtýt jataqhana men isher asyńdy tegin berip, bolashaq toqymashy qyzdarǵa qamqorlyq jasaıdy eken. Meniń balalyq, boıjetken shaǵym asharshylyq pen alasapyran jyldarynda ótti. Taǵdyr aıdap, aǵaıyndarymdy panalap, kúnkóris qamymen týǵan elden jyraqqa — Tashkentke solaı ketkenmin…
Ádette úıdiń tirshiligin jasaı júrip, án salatyn ádetim bar edi. Áli esimde, esiktiń aldyn sypyryp, ándetip júrgenimde ózbek fılarmonıasynyń dırektory daýysymdy estip, "Án aıtqan kim?" dep aýlaǵa kirip keldi. Sodan fılarmonıa dırektory Karı Iakýpov ákanyń kómegimen Tashkent fılarmonıasyndaǵy memlekettik áıelder án-bı ansamblinde ánshi boldym. 1941 jyly Moskva konservatorıasyna joldama alǵanymda soǵys bastalyp ketti.
Men ózbek halqynyń qamqorlyǵyn kóp kórdim. Ózbekstannan Qazaqstanǵa kelýime tikeleı sebepshi bolǵan — aqyn aǵamyz Juban Moldaǵalıev. Moskvada Joǵary partıa mektebinde oqyp júrgen ol Ózbekstan atynan án salyp júrgen qazaq qyzy bar dep estip, arnaıy izdep keldi. "Perızattaı qyz ekensiń, qaraǵym! Ózbekstanda ne bitirip júrsiń?" — dedi óktem daýyspen. Qandaı kelbetti jigit edi. Juban aǵanyń qoldaýymen 1949 jyly elge keldim. Maǵan ákemdeı qamqorshy bolǵan birtýar azamattyń jaqsylyǵyn qalaı umytam. Býdapeshtte ótken án jarysyna meni mápelep qosqan da Juban aǵa bolatyn.

Estelik Áset Aqmoldanyń Facebook-tegi paraqshasynan alyndy

Usynǵan: Gúlim Jaqan