Búgingi satıra

Keshe áıelim Kómbiskúldiń qan qysymymdy 200-ge deıin kótergeni ishime syımaı barady, qaıteıin. Búgingi qoǵamda qaı erkek jetisip júr deısiń... mende solardyń bireýimin ǵoı.... Sonymen qoıshy, Kómbiskúlge, to est áıelime, áı, qanym qaınady - aý bir... 

Ózi úıde aqsha joqta, Kómbiskúlim ústine qyzǵylt jolaqty sur pıdjakti kıip alyp, kóz aldymda sırktiń úıretilgen arǵymaǵyndaı olaı bir, bulaı bir oıqastaǵany – erkektik namysymdy qozdyryp jibergeni... Shynymdy aıtaıynshy, áıelime jarasyp - aq tur qyzǵylt jolaqty sur pıdjak. Baıǵusqa, úkimet sanasyp, aqshadan qarasyp tursa ajary kiretin keıipte. Bes bala tabý ońaı ma, betindegi keıbir ájimderi de... tarqap ketkendeı... kórikti... «Adam kórki shúberek» degen ras - aý. Qolymyzdy baılap turǵany baıaǵy jetispeýshilik... Tarshylyq...Aýzym barmaı turǵany - aı... kedeı - sh- i - l – i - k... Bes balaǵa tólenetin járdemaqy 16 myńnan sál ǵana asady... Ol qaıda jetedi? Anda tartsań mynda jetpeıtin, qý aqsha - aı... Áıtpese....
Únemi bılikke de, maǵan da «yńq» demeı kónip kele jatqan kúldi - kómesh Kómbiskúlim, ózinshe «kóterilis jasap» meniń tastaı qatyp qalǵan sezimderimdi – «elitem», «jandyram», «órteımin» degen nıetpen qyzǵylt jolaqty sur pıdjakti kıip alǵany kórinip tur. Bar ónerin salyp jolymdy kes – kestep qoıady. 
Ana bir ánshi aıtpaqshy, «Bir ǵasyrda bir týatyn erkekpin ǵoı», denesine «jabysqan» sur pıdjak esimdi alyp, ashý jaıyna qalyp «talyqsyp», «álsirep» bara jatqanym buldyr - buldyr esimde. Qasymnan jeldirtip bir óte bergende pıdjaktyń jelke tusynda «alaqaılaǵan», alaqandaı qaǵazdaǵy 500 myń teńgeni kózim shalyp qalyp, qalshıyp turdym da qaldym. «Óńim be, álde túsim be?». Osyndaı da bir án bolýshy edi ǵoı. Sony ishimnen yńyldaı berdim shamasy. (Nesin jasyraıyn, bes bala tapsa da áıelim qýlyqtyń qulynyndaı kerilgen, «fıgýrasy moshnyı» áli. Qara jumysqa ysylǵandiki bolar, alaqany kús-kús, denesi temirdeı qap – qatty ... aqsha júzi... sál – pál ... qaralaý... áıtsede júregi appaq! Tfá-tfá, til kózim tasqa. Bala taptym dep kerilip úıde otyrǵan emes. Shaqalaqty eki – úsh aı emizedi de, kún - tún demeıdi jumysqa shyǵyp kete beredi. Sonysyna rızamyn óz basym).
Sonymen qoıshy, «Jaýǵa syryn aıtpaıtuǵyn, aıtqanynan qaıtpaıtuǵyn» erkek degen atym bar emes pe, boıymdy bılep bara jatqan «qushtarlyqty» silkip tastap,
– Áı, dedim, (500 myń teńge ońaı ma, ishimdi kúıdirip barady) – bul ne qylǵanyń qaǵynyp. «Bassyz úıdiń ıti qutyrady» degen. Bes balany qalaı asyraımyz dep jantalasyp júrgende, páter aqy da kelip qalǵanda, nesıge pıdjak alyp ne kórindi saǵan? Baǵasyna qaramaısyń ba, aldymen? Almaısyń! Qaıta aparyp tapsyrasyń! Seni jeliktirip júrgen kim ózi?.
Baıqaımyn aına aldynda turǵan áıelim mıyǵynan kúlip qoıady. Sózimdi jyryna qystyratyn emes. Bir kezde pıdjagynyń túımesin, attyń aıylyn tartqandaı shirene tartyp saldy da, oqty kózimen meni bir atyp, sóılep ketti.
– Ne, meniń anaý mınıstr qyzdan bir jerim kem be? Kıemin mende. Ony «Forbes» jýrnalynyń muqabasyna shyǵypty dep el shýlap júr. Tap osyndaı pıdjak kıgen kórinedi. Biraq oniki orıgınal. Baǵasyn aıtsańshy, baǵasyn....
– Áı, «Teń teńimen, tezek qabymen» degen. Onyń aılyǵymen, seniń shaılyǵyń teń be? 
– Oıbaı maǵan endi osy kıimdi de kópsindiń be? (Áıelim kózi aǵaryp jylap jiberdi). 
– Endi, ol qyz... to est mınıstr,... bir kezde prezıdent bolýǵa talpynǵan qart komýnısiń qyzy. Aqsha degen úıilgen shómeledeı kóp. Sosyn álemdik brendterdiń kúnde bireýin kıse de erki.
Sózim jaqsy áser etken bolýy kerek áıelim qaıtadan kóńildene bastady. 
– Shirkin, baılar bir kıgen kıimin ekinshi qaıtara kımeıdi deıdi ǵoı. Eski - qusqylaryn ne isteıdi eken, á? Dene turqy da maǵan kelińkireıtin sekildi mınıstr qyzdyń. Áleýmettik jeliden taýyp alyp, «eski kıimderiń bolsa maǵan bershi?» dep jazyp jibersem be eken?
– Iá, ol saǵan «Kómpiskúl, bir kıip tastaǵan kıimderimdi alyp ket, ylǵı aıtqanymyzǵa kónip júrsińder ǵoı» dep shaqyraıyn dep jatyr degen. Odan da, sondaı atty kún týyp jatsa, Mádına hanym, bes balamen jerkepede jatyrmyz, kómek qolyńdy soz, óltirmeseń demeısiń be, Kónbiskúl – aý!
– Bizdiń bala týýdan qolymyz tımeıdi ǵoı. Áıtpese...
– Áıtpese ne, bárin qyryp tastaıtyn ba ediń? 
– Sende qyjyrtyp otyrasyń ylǵı, qaıta kótermeleýdiń ornyna. Shirkin, bizdiń mınıstr qandaı tamaqty súısinip ishedi eken, á? Qasynda otyryp, tym qurysa sarqytyn jep kórer me edi? 
– Balalardyń 16 myń teńge járdemaqysy qolyńa tıgen kúni, shyp - shyrǵasyn shyǵarmaı mınıstrińdi tústendirip jibermeısiń be odan da? Sonda kóresiń ǵoı, nege tábeti tartatynyn!
– Qoıshy sende qaıdaǵyny aıtpaı. Ol da jetisip júr deısiń be? Sharýasy kóp qoı, áıtpese, (bas barmaǵyn maıystyrdy) mynaý degen jigitke kúıeýge shyǵyp, balasyn týyp úıinde otyrar edi ǵoı. Qaıteıin endi. Oılaǵany bizdiń qamymyz. Baıqaýymsha sońǵy ýaqytta tym aýrýshań bolyp ketti ózi. Astananyń aıazy men borany jaqpaı júrme eken, á? Álde, aıaǵynan syz ótip....
Osy jerde shydamym taýsylyp sózin bólip jiberdim.
– Áı, «Attyǵa eremin dep, jaıaýdyń tańy aıyrylypty» degen bar. Osy seniki ne jelik? Qıalǵa berilip bolsań, balalarǵa qara. Olardyń jyrtyq kıimderi bolsa jama. Shamańa qara. Seniń 500 myńǵa alǵan pıdjagiń, bizdiń otbasyǵa tamaq bolmaıdy. Kózin qurt!
Áıelimniń kózi sharasynan shyǵyp ketti.
– Oıbaı, qaıdaǵy 500 myńdy aıtyp otyrsyń? Sen mınıstr qyzdyń pıdjagymen shatastyryp otyrǵannan saýmysyń?
– Ústińdegi kıimniń baǵasyn aıtam.
Áıelim, tyrq - tyrq etip kúldi - aı kep.
– Óı, sorly - aý, bazardaǵy kıim ólshep satatyn jerden 500 teńgege ala salǵam, keshe. Anaý, mınıstrimizdiń pıdjaginen aýmaı turǵasyn. Áıelder qaýymy sońǵy moda dep shýlap jatyr ǵoı, áıteýir. Bolmasam da uqsap baǵaıyn dep... Kóp balaly analarǵa jeńildikpen berip jatyrmyn dep saýdager de qoımady bir jaǵy. 
Jalma - jan áıelimniń pıdjaginiń jelkesine jabystym. Qara flomastermen 500 teńge dep jazylyp tur eken. 500 myń bolsa ne ister em? Óz kózime ózim senbeı qaıta qaradym. 500 teńge! Ýh! Qýanǵanymnan áıelimniń betinen shóp etkizdim.

Naǵashybaı Qabylbek,

«Qazaqstan dáýiri» gazetinen