Qazirgi tańda kóptegen qyz-kelinshekterge keńes berip júrgen tanymal psıholog, medıtator Zarına Hantóre oqyrmannyń kókeıinde júrgen birneshe saýaldarǵa jaýap berý úshin Qamshy.kz aqparat agenttigi tilishisimen suhbattasty. Sol suhbatty tolyǵymen oqyrman nazaryna usynamyz.

–Psıhologıa álemine qalaı keldińiz?

–Meniń psıhologıa álemine kelgenime bıyl – on birinshi jyl. Psıholog maman retinde tórtinshi jyl jumys istep jatyrmyn. Bylaısha aıtqanda, psıhologıa álemine adasyp keldim. Ózimdi biraz ýaqyt boıy tappaı qınalyp júrdim. Negizi adam balasy aqyldan,tánnen, jannan turady ǵoı. Únemi meniń janymnyń ishinde bir qýys oryn turatyndaı boldy. Ony eshteńe qanaǵattandyra almady. Kishkentaıymnan anamnan aıyryldym. Ákeniń tárbıesinde boldym. Osylaı kóp ýaqyt izdeniste júrdim.Sóıtip júrip  aýrýǵa ushyradym. Denemde rak kletkalary oıandy. Aýyryp júrip kúızeliske tústim. Kúızeliste júrip uıqysyzdyqqa shalyndym. Osy kezde "psıhologqa barýym kerek" dep sheshtim. Lúdmıla Afanaseva degen psıhologpen kezdesip, biraz sabaq aldym. Sol kezde túsingenim –meniń kúızelisim janymdy túsinbegendikten eken. Osylaı jantaný ilimine kelip, janym tynyshtyq tapty.

–Sizdiń aldyńyzǵa qyz-kelinshekter kóbine qandaı máselemen kelip jatady?

–Meniń aldyma kóbine kúıeýimen qarym-qatynasyn túzegisi keletinder, enesimen otbasy araqatynasyn jaqsartqysy kelgender, qaryzǵa batyp ketken kisiler kóp keledi. Barlyǵyna shamam kelip, bilimim jetkenshe, psıhologıalyq kómek berýge tyrysamyn.

–Din men psıhologıa egiz uǵym ba?

–Men áýeli psıhologıa salasy arqyly  dinge keldim. Ózimniń bir jaratýshy qudaıymnyń bar ekenin sol kezde uǵyndym. Psıhologıanyń artyn qazsańyz – din.

–Qazirgi tańda kóptegen psıhologtar óz sabaqtarynda batystyń psıhologıasyn usynyp jatady. Buǵan kózqarasyńyz qandaı?

–Men bireý úshin jaýap bere almaımyn. Árkimniń ishinde ne bar, ózi qandaı senimde, tek sol týraly aıtady. Mysaly: qyzyl jip taǵyp júrý til-kózden qorǵaıdy deý, ol qate pikir. Bizdi tek qorǵaıtyn – bir Alla ǵana.

–Marafonyńyzda baǵaly syılyqtar usynyp jatasyz, ne sebepti?

–Basynda marafondy bastanda joldasym tegin ótkiz degen bolatyn. Biraq, tegin kelgen dúnıeniń esh qadiri bolmaıdy. Marafonnan jınalǵan aqshany  árdaıym utysqa qoıamyn. Úıde otyrǵan qyz-kelinshekterge motıvasıa bolsyn deımin. "Mysaly, ol qyz 100 myń teńge utyp alsam, kóılek alamyn nemese anama syılyq alamyn" degen armanyn iske asyrsyn deımin. Allaǵa shúkir, meni Alla taǵala baı, qýatty etti. Bul jerde baǵaly syılyqtardy qyz-kelinshekterge syılyq retinde taratamyn.

–Elimizde qyz balalardy kelindikke daıyndaıtyn ınstıtýt ashý oıyńyzda bar ma?

–Ia, ashý kerek dep oılaımyn. Qyz bala joǵarǵy oqý ornynda oqyp, kásibı bilim alyp jatady. Al olarǵa kelin bolýdyń qyr-syryn eshkim úıretpeıdi. Bolashaqta árbir boıjetkendi ómiriniń belesteriniń biri kelindikke daıarlaý is óte kerek dep oılaımyn.

–Enelerge arnap semınar ótkizý oıyńyzda bar ma?

–Ózim jaqynda ene boldym. Aldaǵy ýaqytta enelerge arnap úlken semınar ótkizsem deımin. Ol jerde kelinmen qarym-qatynasta qalaı bolý kerek, otbasy qundylyǵyn saqtaý degenimiz ne? Mine, osy nárselerge keńinen toqtalatyn bolamyn.

                                                                                             Suhbattasqan: Ásem Merekeqyzy