Qyzylorda oblysynyń ákimi Q.Kósherbaev Aqsýat aýyldyq okrýginiń turǵyny Jámılá Sadýovaǵa jańa páterdiń kiltin tabystady dep habarlaıdy Qamshy.kz aqparat agenttigi.

«Aqmeshit» ortalyq meshitiniń aýmaǵynda dástúrli «Júrek jylýy» qaıyrymdylyq aksıasy ótti. Shara aıasynda az qamtylǵan 1600 astam otbasyna azyq-túlik taratyldy.

«Jabyrqaǵannyń janynan tabylý, sharasyzǵa kómek qolyn sozý, qaıyrymdylyq jasaý – halqymyzdyń qanyna bitken asyl qasıetterdiń biri. Ózderińiz bilesizder, osydan birer aı buryn, úsh birdeı búldirshinimizden qapıada kóz jazyp qaldyq. Bul qaıǵyly jaǵdaı tek bir otbasynyń ǵana emes, tutas eldiń qabyrǵasyn qaıystyryp, eńsemizdi túsirdi. Biraq, Allanyń isine amal bar ma?! Halqymyzda "Qaıǵyny bólisseń azaıady..." degen sóz bar. Olaı bolsa, sol úsh búldirshinimizdiń anasy Jámılá Sádýova qaryndasymyzǵa Syrdarıa ózeniniń sol jaǵalaýyndaǵy jańa qaladan 2 bólmeli páterdiń kiltin tabystaǵaly otyrmyz»,-dedi aımaq basshysy.

Sondaı-aq,  jergilikti kásipkerler men qoǵam belsendileriniń demeýshiligimen 1600 astam az qamtylǵan januıalarǵa azyq-túlik paketteri taratyldy. Qaıyrymdylyq sharasy aıasynda qarjylyq kómek kórsetýdi qalaǵan jandar úshin «Aqmeshit-Syrdarıa» ortalyq meshiti aýmaǵynda arnaıy jáshik qoıyldy. Árbir mekenjaıǵa azyq-túlikterdi jetkizetin kólikter uıymdastyryldy.

Aıta keteıik, qaıyrymdylyq sharalaryn ótkizý aımaqtyń ıgi dástúrine aınalǵan.

Kópbalaly otbasylarǵa qoldaý kórsetý maqsatynda aımaqta  júıeli jumystar júrgizilýde: az qamtylǵan otbasylardyń, ásirese, aýyldyq jerden shyqqan talapty balalardy oqytýǵa oblys ákiminiń arnaıy granty taǵaıyndalyp keledi. Osy bilim grantynyń negizinde 2013 jyldan bastap 900 jýyq talapty jas elimizdiń beldi joǵary oqý oryndarynda bilim alýda.

Apattyq jaǵdaıdaǵy turǵyn úıler men jataqhanalardyń turǵyndary «Orda» baǵdarlamasy aıasynda jańa páterge ıe boldy. Esterińizge salaıyq, 2017 jyly aımaqtyq «Orda» turǵyn úı qurylysyna baǵyttalǵan Jol kartasy ázirlengen bolatyn. Baǵdarlama sheńberinde 19 jylǵa deıingi 35 myńnan 43 myń teńgege deıin tólemmen, 20%  aldyn-ala tólemsiz 500 myń kepildik jarnasy arqyly páter alýǵa bolady. Baǵdarlama sharttaryna sáıkes, baspana kezeginde turǵan kópbalaly jáne tolyq emes otbasylar; múgedek balasy bar nemese múgedek bala tárbıeleýshi otbasylar; jetim balalar men ata-anasynyń qamqorlyǵynsyz qalǵan balalar; 1-2 top múgedekteri; oralmandar; sondaı-aq,  2 jyl nekede turǵan, balalary bar erli-zaıyptylardyń jasy 35-ke tolmaǵan otbasylarǵa alýǵa bolady. Osylaısha aımaqtyq «Orda» baǵdarlamasy Elbasynyń «7-20-25» bastamasynyń jalǵasy bolyp sanalady.

Esterińizge salaıyq, 13 aqpanda ótken oblys ákiminiń esepti kezdesýinde aımaq basshysy áleýmettik az qamtylǵan otbasylardy baspanamen qamtýǵa baılanysty arnaıy óńirlik baǵdarlama ázirleýdi tapsyrǵan edi.

Usynǵan: Gúlim Jaqan