Horvatıanyń soltúsitigindegi Poloves aýylynda 18 jyl buryn joǵalyp ketken qyzdyń máıiti tabyldy. Bul jaıynda Qamshy.kz aqparat agenttigi jergilikti Index.hr saıtynyń málimetine súıenip habarlaıdy.

Iasmına Domınıch esimdi qyz 2000 jyly joǵalyp ketken, ol kezde 23 jasta bolypty. Alǵashynda týystary ony "Fransıaǵa ketip qalǵan, sol jaqta jumys istep júr" dep aıtqan. Olar tek 2005 jyly ǵana polısıaǵa júgingen. Polısıa qyzmetkerleri úıdiń syrtyn tolyqtaı izdep, ishine kirmegen eken.

Belgili bolǵanyndaı, osy ýaqytqa deıin joǵalyp ketken qyzdyń máıiti úıdegi bólmelerdiń birinde tońazytqyshta saqtaýly bolypty. Búginde ol úıde Iasmınanyń úlken ápkesi kúıeýimen turady. Sondaı-aq, ol úıde qyzdyń ákesi de turǵan eken, ol eki jyl buryn kóz jumǵan. Al anasy bolsa Germanıada jumys isteıdi.

Jergilikti BAQ-tyń derekterine sáıkes, úıde elektr toǵy óship qalyp, máıittiń ıisi shyǵa bastaǵan, sol arqyly tabylǵan eken. Iasmınanyń máıitin onyń ápkesiniń kúıeýi taýyp alǵan bolýy múmkin degen derekter de bar.  Bul ýaqytqa úıinde tońazytqysh ornatylǵan kamera bar ekenin bilmepti.

Polısıa qyzmetkerleri "Iasmınany onyń ápkesi óltirgen bolýy múmkin" dep kúdiktenýde. Bolǵan jaıttyń mán-jaıyn anyqtaý maqsatynda prokýratýra DNK saraptamasy men medısınalyq ekspertıza jasamaq. Rastalmaǵan derekterge sáıkes, 45 jastaǵy áıel qamaýǵa alynyp, tergeý ızolátoryna qamalypty.

Usynǵan: Nazerke Labıhan