«Álippe» pen «Ana tilin» qaıta bilim berý júıesine engizý týraly másele áleýmettik jelide qyzý talqyǵa salynýda. Eske sala ketsek, Bilim jáne ǵylym eks-mınıstri Erlan Saǵadıev bilim júıesine biraz ózgerister engizdi. Ol bastaýysh synyptan "Álippe" men "Ana tili" oqýlyqtaryn alyp tastap, onyń ornyna "Saýat ashýdy" engizgen bolatyn. Bul jaǵdaı halyq arasynda biraz daý týdyrǵanymen, 2015 jyldan bastap "saýat ashý" bilim júıesine engizilip, áli kúnge qoldanylyp kele jatyr. Endi halyq jańa Bilim jáne ǵylym mınıstrinen "Álippe" men "Ana tilin" qaıta engizýdi talap etýde dep habarlaıdy Qamshy.kz aqparat agenttigi.
Aıta ketsek, 5 naýryzda Serik Ábikenuly facebook paraqshasynda eks-mınıstr Erlan Saǵadıevtiń bilim júıesine engizgen ózgeristerin qatań synǵa aldy.
"Saǵadıev "jaqsy jumys istedik" dep ózine-ózi baǵa beripti. Kúldim de: E, jón, - dedim. Bir salanyń oıran-botqasyn shyǵarǵan ekstiń este qalar bir sózi boldy. Al jańa mınıstr Kúlásh apaıymyzdan Saǵadıevtiń otyrǵan jerine úıip ketken problemasyn kúrekpen tazalap tastaýdy suraımyz" - dep jazǵan Serik Ábikenuly.
Ol bastaýysh synyp balalaryna áýeli mátin oqytyp, odan keıin árip úıretetin qoıyrtpaq ádistemeni alyp tastap, ornyna "Álippe" men "Ana tilin" qaıta engizilýin talap etken. Sondaı-aq «álipbı shıki bolsa qazaq balasynyń mıy aıran bolady» dep jan aıqaıyn jetkizdi.
Bilim salasynyń bylyǵyp ketkenin alǵa tartyp, qazirgi QR Bilim jáne ǵylym mınıstri Kúlásh Shamshıdınovanyń qolynan keletinine senim artatyndyǵyn aıtady.
Bul jaǵdaı qarapaıym halyqtyń arasynda da qoldaý tapqan. Áleýmettik jeli qoldanýshylary da bul máselege qatysty ózderiniń pikirin bildirip, jańa mınıstrge úlken senim artyp otyr.
"İske sát, Kúlásh apaı. "Álippe" men "ana tilimiz" qaıtip kelgeı! Sizge senemin", - dep jazdy jeli qoldanýshylarynyń biri.
«Buryn osy apamyzdy Bilim jáne ǵylym mınıstrliginen almaǵanda, Qazaqstan qazir bilim jóninen kóp ilgeri ketetin edi. (2002-2005 jáne 2007-2009 jyldary QR Bilim jáne ǵylym Mınıstrliginde vıse - mınıstri bolyp qyzmet atqarǵan — Red.) Bylaısha aıtqanda, bárin daıyndap, shaıdy ádemilep jasap, endi ishýge otyryp jatqan kezde tosynnan jaǵdaı bolyp, bári óre túregelip, daıyndaǵan shaı jaıyna qalatyndaı dúnıe boldy ǵoı. Osy Kúlásh apamyz keremet bolatyndaı oqý isin qolǵa alyp, endi iske asyramyz dep jatqanda mınıstrlikten alyp tastaǵan. Qazir qaıtip kelgenine qýanyp otyrmyn. Tek endi tez qımyldasa eken. Taǵy ózgertip tastar dep qorqamyn. İske sát, Kúlásh apaı! "Álippe" men "Ana tilimiz" qaıtip kelgeı! Sizge senemin. Men muǵalim bolǵan emespin, biraq, bala bilimine janashyr adammyn» - dep jańa mınıstrge senim bildiretindigin jetkizedi Svetlana Mýafıhova esimdi áleýmettik jeli qoldanýshysy.
Sondaı-aq, "Qos qoldap qoldaımyz. Mınıstr hanym, siz birinshi kezekte anasyz ǵoı. Balalarymyz óspeı jatyp shógip jatyr. Qaıtaryńyzshy álippeni! Qoldaımyz. Álippe durys. Qazir sany bar sapasy joq kitaptar balanyń mıyn ashytyp jatyr. Ia, qoldaımyn «Álippemiz» ben "Ana tilimiz" qaıta kelsin" degen syndy pikirler halyq arasynda kóptep aıtylýda.
Usynǵan: Farıza Jomartqyzy
