Elimizge belgili qoǵam belsendisi, zańger Aıgúl Orynbek ánshi Ábdijappar Álqojanyń ústinen qylmystyq is qozǵalýyn talap etýde, dep jazady Qamshy.kz aqparat agenttigi.
Áleýmettik jelidegi paraqshasynda ánshiniń "Qoja" rýyna qatysty aıtqan sózine baılanysty óz pikirin bildirdi.
"Ulttyń Qaýipsizdik qyzmeti qaıda qarap otyr?
Myna ánshiniń ústinen qylmystyq is qozǵalsyn!
QR Qylmystyq kodeksiniń 174-bap. Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý babymen jazalansyn!
Sonda Qazaqtyń elinde, jerinde turyp biz olardy buzyp jatyrmyz ba?
Sonda Qazaqtyń qany taza emes buzylǵan dep aıyp taǵyp otyr ma?
Sonda Qazaqtyń qyzdary buzylǵan ba?
Nege osyndaı el aldynda júrgen juldyzsymaqtar aýyzdaryna baıqap sóılemeıdi?!
Biz Arab eline baryp buzǵan joqpyz, ózderi dýana sıaqty qańǵyp kelip, qazaqtar keńpeıil jaıly bolǵan soń osynda qalyp qoıdy! Olaı rýǵa bólip, bizdi mensinbeı qaraýdy toqtatyńdar!
Sosyn qazaqty árkim basynyp bitti ǵoı! Sharshatty osylaı joǵarydan mensinbeı qaraıtyndar! Aýyzdaryńa baıqap sóıleńder!
"Árbir qazaq jalǵyzym"-degen Sabyr Adaıdyń uly sózin umytpańdar!
Ábdijappar Álqoja, halyq aldynda keshirim sura, áıtpese zań aldynda osy sózderiń úshin jaýap beresiń!" - dep jazady Aıgúl Orynbek.
Aıta keteıik, birneshe kún buryn ánshi Ábdijappar Álqoja "31" arnanyń "Óner men ómir" baǵdarlamasynda qojalar jaıly el arasynda aıtyla bermeıtin jaıttardy atap bergen bolatyn.
"Qazir qojalardyń kóp jigitteri qaradan qyz alyp jatyr. Biraq, meniń aǵalarymnyń bári qojadan qyz alǵan. Bizdiń áýlette tek Roza ápkem ǵana alban jigitine turmysqa shyqty. Qalǵan eki ápkem qojaǵa turmysqa shyqty. Túbi arabtan shyqqannan keıin ıshan degen nárse, úlken sopylardan keıingi musylmannyń dárejesi. İlimniń, bilimniń dárejesi. Ishandar tek qojalardan shyǵady. Sopylar da sondaı. Qazaqtan shyqqandy molda dep aıtady. Pir Beket bar qazaqtan shyqqan. Qalǵanynyń bári qojadan shyqqan. Arystan bab pen shákirti Qoja Ahmet Iassaýı de qojadan shyqqan. Ishandar bir quran men súreni aıtqanda, jynyn sýyryp alatyn bolǵan. Ondaılar qazir joq. Sonyń azaıyp ketýi. Atalarymyz úsh júzden, qazaqtan alyp qoıdy. Sóıtip qan buzyldy. Eger qazaqtan aralasqan bolsa, olardan ıshan shyǵý qıyn", - degen ánshi halyqtyń synyna ushyraǵan bolatyn.
Usynǵan: Nazerke Labıhan
