Aqtóbede balabaqsha tárbıeshileri búldirshinderdi ashtan qatyryp, tamaq surasa shapalaqpen urǵan. Bul týraly ata-analar shaǵymdanýda. Bul qanshalyqty ras? Al mekeme basshylyǵy ne deıdi? Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.
Alına Obaıdýllına kórmegenim endi osy balabaqsha bolsyn dep otyr. Úsh jasar uly "tárbıeshi shapalaqpen salyp jiberdi" dep kelgende, "bala ǵoı, qosyp aıtqan shyǵar" dep senbepti. Al jaqynda kelinshektiń qolyna tańǵy as kezindegi myna beınejazba túsken. Ony kórip, tóbe shashy tik turypty.
«Balalardyń aldynda botqa degen atymen bolǵan joq, tek nan men maı, sosyn shaı boldy. Dereý túski as kezinde bardym, meńgerýshimen sóılestim. Túski asqa ne beresizder dep edim, sorpa bolady dedi. Men oǵan da kúmándandym. Al ekinshi as bolǵan joq. Sebebin suraǵanda, bári ata-analardyń qaryzyna kelip tireledi dep túsindirdi», - dep shaǵymdandy balalardyń anasy Alına Obaıdýllına.
Astan shyqqan aıqaı áli basylmaı tur. Balabaqsha quryltaıshysy "munyń barlyǵy bizdiń mekemege jabylǵan jala" dep otyr. Mázir talapqa saı jasalady dep sendirdi.
«Shamaly qatelikter boldy bizde, núansy. Sebebi, bir ata-ana ekinshi tamaqtaný kezinde telefonǵa túsirip alyp 1-tamaq dep sossetke saldy. Men jala jaýyp tur deımin», - deıdi balabaqshanyń quryltaıshysy Tolqyn Shektibaeva.
Balabaqsha qojaıyny qansha jerden ata-ana jala japty degenimen memlekettik tapsyrysty oryndap otyrǵannan keıin «sýdyń da suraýy» bar. Qalalyq bilim bólimi arnaıy komısıa quryp, mektepke deıingi uıymda tekseristi bastap ketken.
«Ata-ana tarapynan shaǵym bolǵanda, tamaq máselesi, as máziri , sosyn oqý prosesi sol shaǵym kezinde búkil qujattaryn zertteımiz. As máziri tamaqtary durys daıyndalmaıdy dep berilip tur. Sondyqtan, sol baǵyt boıynsha jumystar júrgizemiz», - deıdi qalalyq bilim bóliminiń bas mamany Gúljan Ámirova.
Osy jaǵdaı sebep boldy ma, joq álde kezdeısoqtyq pa, áıteýir ata-analar balalaryn basqa mekemege aýystyrýǵa aryzdanyp jatyr eken.
Ata-analary shý shyǵarǵan balabaqshanyń balalaryna tamaqty minekeı, osy asúıde ázirlegen. Ózderińiz kórip turǵandaı, qazir myna jerde tipti elektr jaryǵy da joq eken. Munda qazir qalalyq bilim bólimi arnaıy tekseris júrgizip jatyr. Kemshilikterdi joıýǵa belgili bir ýaqyt beredi. Eger sol ýaqyt ishinde joımasa, kelisim shartty územiz dep málimdedi.
Usynǵan: Nazerke Labıhan
