Kúni keshe jasalǵan Toqaev úndeýinen soń el arasynda saılaýǵa kim túsetini týraly dúdámal pikirler jaýynnan keıingi sańyraýqulaqsha qaptap ketti. Shyntýaıtynda, saılaýǵa túsetin úmitkerler arasynan utymdy baǵdarlama jasap, tutqa ustaýǵa umtylatyn bireý tabylar ma eken?

Múıizi qaraǵaıdaı saıasatkerler de jóndi boljam jasaýǵa qınalyńqyrap otyr. Biraq keshegi aıtýly kúnde birqatary pikir bildirdi. Sol «birqatar» saıasatkerlerdiń pikirine nazar salaıyq.

Marat Shıbutov aldaǵy kezekten tys prezıdent saılaýyna tórt partıa úmitkerleri, anyǵyn aıtqanda, sol tórt partıanyń basshylary jáne birli-jarym qoǵamdyq qozǵalystardyń úmitkerleri túsedi dep boljaıdy.

Al Erbol Edilov bıliktegi partıadan qazirgi prezıdenttiń kandıdatýrasy usynylatynyna jáne Darıǵa Nazarbaevanyń bul báıgege at qospaıtynyna senimdi.

Belgili saıasatker Dosym Satpaev saılaý naýqanynyń ádil ótýi týrasynda ashyq aıtty.  «Bul saılaýdyń senarıi, kim saılanyp, kim qatysatyny jáne naýqanda kimderdiń qandaı qyzmet atqaratyny aldyn ala belgilengen. Opozısıalyq toptardyń aýyzyna qum quıylyp otyr. Al aımaqtardaǵy ákimder bılikten tek qana pármen kútýde. Saılaý týraly jarıalaý men onyń ádil ótýi – eki bólek dúnıe. Bizdegi memlekettik apparat saılaý ótkizýdiń bir ǵana túrin biledi. Basqasha jasaýǵa qaýqarsyz», - dedi ol.

Al bıliktegiden ózge partıalar halyq kóńilinen shyǵatyn baǵdarlama jasap, dodaǵa bel sheshe kirisip ketýge qulyqty ma?

Saıasatkerlerdiń barlyǵy tilin bezep, úmitker shyǵarady dep otyrǵan tórt partıa: «Aq Jol», «Qazaqstan komýnıstik halyq partıasy», «Aýyl» partıasy jáne «Nur Otan» partıasy.

Bıliktegi partıa qatarynan shyǵatyn úmitkerdiń salmaqty bolary anyq. Ol úmitker qazirgi prezıdenttiń ózi bolýy da ábden múmkin.

Kezekten tys saılaý týraly jarıalamas buryn memleket basshysy Qasym-Jomart Toqaev «Aq Jol» partıasynyń tóraǵasy Azat Perýashevti, «QKH» partıasynyń Ortalyq Komıtetiniń hatshysy Aıqyn Qońyrovty, «Aýyl» partıasynyń tóraǵasy Álı Bektaevty qabyldaǵanyn bilemiz.

Bul basqosýda ne sheshildi, prezıdent kimge qandaı nusqaý berdi? Bul jaǵy beımálim.

Endi kelesi dúnıege nazar aýdaryp kórelik. Sońǵy saılaýlarda ózin-ózi usynýshy azamattar qatary sırep ketti. Ózderi nan tappaıtynyn bildi me, álde halyqtyń olarǵa pysqyryp ta qaramaǵany kóńilderine qaıaý túsirdi me, áıteýir bir bulyńǵyr dúnıe...

Sondyqtan, aldaǵy saılaýda úmitkerler partıa nemese qoǵamdyq qozǵalystar qatarynan shyǵatyny belgili.
"Dodany qyzdyrady" degen azamattardyń qarjy máselesin alǵa tartyp, sıez sheshimin syltaýratyp tartynshaqtaýy kúdik týǵyzady-aq. Al eki sóziniń biri «halyq» bolyp, atoılap turǵan ultshyl azamattardyń qarjylyq áleýeti men mańyzdy baǵdarlamalary bolmaı dińkelep otyr. El qamynda sóıleý men naqty jobalar arqyly ony dáleldeý eki bólek nárse ekenine osy tusta kóz jetkendeı.

Utymdy baǵdarlamalar, naqty josparlar, san túrli kózqarastaǵy halyq, naqty daýys sany, bular – ádil saılaýdyń beınesi.

Toqaev ýáde etkendeı, saılaý naýqany da, saılaý qorytyndysy da erekshe ádil bolsa, memlekettik basqarý júıesiniń tutqasy ózge ýysqa kóshkenine dálel.

Al ultshyldar bılikti tek túsinde kórip júr. Oıanǵanda sol jaqqa qarap bir esineıdi de, qalypty soqpaǵymen tarta beredi. Olardy halyq qoldaǵanymen, bılik olardy qalaı ma?!.

Ádilet Mádenıet