Shymkentte óńirge tanymal iri kásipker men onyń jubaıyn aıýandyqpen óltirip, mıllıondaǵan aqshasy men altyn-kúmisterin alyp ketken kólik júrgizýshisiniń soty ótýde. Alǵashqy tyńdalymynda marqumnyń uly sotqa deıingi tergeý amaldarynda kóptegen burmalaýshylyq bolǵanyn jaıyp saldy. Sóıtip, sýdıadan qylmystyq isti qaıta tergeý úshin keri qaıtarýdy suraǵynymen, onyń ótinishi qanaǵattandyrylmady. Jábirlenýshi nege jáne kimge ókpeli? Sýdıa nelikten onyń ótinishin qanaǵattandyrmaı tastady. Bul týraly Qamshy.kz aqparat agenttigi Eýrazıa birinshi arnasynyń deregine súıenip habarlaıdy.

Qandy oqıǵa osy jyldyń 6-aqpanynda kásipkerdiń óz úıinde bolǵan. Buǵan deıin erli zaıyptylardyń jeke kólik júrgizýshisi bolyp jumys istegen 27jastaǵy jigit tún jamylyp, úıge kiripti. Sóıtip, birinshi qabatta jalǵyz ózi alańsyz uıyqtap jatqan 64 jastaǵy er adamdy qarýmen atqan.  

Marqumnyń ulynyń aıtýy boıynsha, kúdikti osy jerde onyń ákesin shalqasynan jatqan jerinde qarýmen atyp óltiripti. Aýyr dene jaraqatyn alǵan ol tilge kelmesten mert bolǵan. Sodan izinshe oń jaqta turǵan shıfonerdiń ishin ashyp, seıften aqsha urlamaqshy bolǵan. Biraq, onyń kiltin tappaı, kelesi bólmege ketken.

«Sol kózge tıgen oq. Bir kózine ǵana tıgen. Bytyra eshqaıda shashyramaǵan. Kóziniń ishinen bytyranyń oqtaryn alyp shyqqan. Osynyń saldarynan patologqa qan shashyraǵan. Áli de tur. Perde de tur. Osy qylmystyq iske osy qandardy tirkeýge aldyra almaı otyrmyn», - deıdi marqumnyń uly Serikbaı Toıbaev.

Úı ıesin ońaı jaıratyp salǵan qanypezer kelesi bólmede nemeresimen demalyp jatqan 62jastaǵy ájeniń denesine on eki ret pyshaq suǵyp alǵan. Odan keıin uryp, soǵyp dene súıekterin on bir jerinen syndyrǵan. 

«Óte qatty nársemen urǵan bolýy kerek nemese obrezben. Ol aıtady, men urǵanda bir qolymda pyshaq ekinshi qolymda obrez bolǵan dep. Bul sol qolymen uryp, dene jaraqatyn sala almaıdy ǵoı. Sol maǵan kúdik keltirip jatyr. Dene jaraqatyn qalaı salǵany týraly», dep aıtty Serikbaı Toıbaev.

Biraq, kúdikti alysqa uzamaı qolǵa tústi. Aıǵaqty zattar alynyp, kinásin moıyndaǵan eken. Alǵashqy sot tyńdalymynda prokýror aıyptaý aktisin oqyp, oqıǵanyń búge-shegisine deıin baıandap berdi. 

«Óziniń is áreketterinde QR QK 287 babynyń 3-shi bóliginde, 192 baby, 3 bóligi, 2 tarmaǵymen jáne 99baby 2-shi bóligimen 1,8-shi tarmaqtarymen kórsetilgen qylmystyq buzýshylyqtardy q jasaǵany úshin sotqa berilip otyr», - dep málimdedi Shymkent qalasynyń prokýrory, memlekettik aıyptaýshy Maqsat Qojabaev.

Degenmen, marqumnyń uly qylmyskerdiń jalǵyz bolmaǵanyna senimdi. Biraq qylmystyq isti júrgizgen tergeýshi qalaıda isti tezdetip aıaqtap, sotqa ótkizýge nıetti bolǵanyn jasyrmady. Tipti, birqatar saraptamalar da júrgizilmegenge uqsaıdy. Ókinishtisi sol, qaıtys bolǵan anasynyń qoly men qulaǵynda bolǵan altyndar tekserý kezinde úshti-kúıli joǵalyp ketipti. 

Asa aýyr qylmys jasady dep aıyptalǵan jigittiń sot otyrysy alqa bılerdiń qatysýymen de ótýi múmkin edi. Alaıda, sottalýshy odan bas tartty. Kelesi proses 26-shy sáýirge belgilendi. 

Usynǵan: Nazerke Labıhan