"Týǵan qyzym menen teris aınaldy, sóıleskisi kelmeıdi!" Aqtóbelik kelinshek 11 jastaǵy qyzynyń bolashaǵy úshin qatty alańdaýly. Aıtýynsha, onyń minez-qulqy ákesiniń úıine barǵannan keıin adam tanymastaı ózgerip ketken. Tipti, anam maǵan qol kóteredi dep jalǵan sóıledi, deıdi. Bul jaıynda Qamshy.kz aqparat agenttigi Eýrazıa birinshi arnasyna silteme jasap habarlaıdy.

Aqmaral joldasymen 2012 jyly zańdy túrde ajyrasqan. 11, 13 jastaǵy qyzdary men 8 jastaǵy egiz uldary sottyń sheshimimen anasynyń tárbıesinde qalady. Erli-zaıyptylardyń arasyndaǵy túsinispeýshilikke balalardyń esh qatysy bolmaǵannan keıin, ol balalardyń ákelerimen kezdesip turýyna kedergi bolmaǵan. Uldary men qyzdary mereke, demalys kúnderi ájelerine qydyryp baryp, qonyp qalyp júrgen. Tek naýryzdaǵy merekeden keıin ákesine barǵan ekinshi qyzynyń minezi kúrt ózgergenin baıqaıdy. 

«Bala menen qorqyp, zábir kórgen qusap qaldy. Úlken qyzyma da "seni alyp ketedi, ákem dokýment daıyndap jatyr" dep, shyńǵyryp, ákesi esikti teýip, alyp ketti. Alyp ketkennen keıin meniń ústimnen aryz jazyp, "mamam meni qylǵyndyrdy, sotkamen basymnan urdy" dep, medekspertızadan spravka alyp, 8-i kúni ákimshilik sot boldy», - deıdi oqýshy qyzdyń anasy Aqmaral Kelbetova.

Al Aqmaral qyzyn urmaq túgili, daýys kótermeıtinin aıtady. Balalary da bir-birine qamqor, baýyrmal . Analaryna «siz» dep sóıleý kerek dep tártip ornatqan da osy 11 jastaǵy qyzy eken. Aqmaral onyń aıaq astynan «ákeme ketem» dep sheshim qabyldaýyna bireýlerdiń yqpaly boldy dep kúmándanady. 
 
«Al men qalaı alıment durys, ýaqytyly tólemegendikten, onyń qaryzy bolǵannan keıin , qoldan jasap otyrǵannan keıin, mınımalnyı tóleıtin bolǵasyn, óndirip berýin suraǵannan keıin bastaldy, munyń bári. Úıdegi baýyrlary bar, egiz inileri bári saǵynyp júr», - dep aıtty Aqmaral Kelbetova.

Mán jaıdy bilmek bolyp balalar aýrýhanasyna bardyq. Nevrologıa bólimindegiler qyzdyń qandaı dıagnozben jatqanyn, ne em jasalyp jatqanyn ashyp aıtpady. Dárigerlik qupıa dep otyr.
 
"Belgili bir nevrologıa belgilerimen tústi, jaǵdaıy jaqsy. Tolyq tekserýlermen em qabyldap jatyr", - dep málimdedi oblystyq balalar aýrýhanasy nevrologıa bólimini meńgerýshisi Baǵıla Jumasheva.

Aqmaraldyń aıtýynsha, balalarynyń ákesi qazir otbasyn qurǵan. Ekinshi nekede ortaq uldary bar eken. Er adamdy burynǵy kelinsheginiń ústinen sotqa shaǵymdanýyna ne túrtki bolǵanyn suraǵanymyzda, «qyzymnyń sheshimi- osylaı, ol anasymen turǵysy kelmeıdi» dedi. Al Aqmaraldyń týǵan qyzyna qol kótergenin ol da "óz kózimmen kórmedim" dep otyr. 

QANAT ABDÝL, OQÝSHY QYZDYŃ ÁKESİ : «Men kózimmen kórgen joqpyn. Týǵan sheshesi qol kóterdi balaǵa, jaǵdaıy jaman boldy dep aıta almaımyn."Men mamamen turǵym kelmeıdi", dedi, bala bolǵasyn, endi andaı-myndaı usaq-túıek áńgime aıtady ǵoı, Men aıttym, "bota, ondaı terme áńgime kerek emes, ómirlik qadamyń, bul saǵan mazaq emes, búgin papamen turam, erteń mamamen turam, durystap oılan"», - dep aıtty qyzdyń ákesi Qanat Abdýl.

Kelinshektiń máselesimen tanysqannan keıin, qorǵanshylyq bólimindegiler sońǵy sheshimdi sot qabyldaıtynyn aıtty. Osy oqıǵadan keıin qyzdyń ákesi lezde quzyrly oryndarǵa balanyń turǵylyqty meken-jaıyn anyqtaý týraly aryzdanǵan. 

«Balanyń turǵylyqty meken-jaıyn anyqtaýmen sot aınalysady. Ákesi kedergi jasaıtyn bolsa, bizge aryz jazyp ketińiz, biz balanyń anasymen kezdesip turýyna sheshim shyǵaryp beremiz», - dep aıtty qalalyq bilim bóliminiń sektor meńgerýshisi Aǵypys Shaǵyrova.

"Balasyna qol kóterdi" dep ákimshilik jaýapqa tartylǵan Aqmaralǵa aıyppul salǵan. Alaıda, kelinshek munymen kelispeıdi. Medsınalyq saraptamanyń qorytyndysyna da kúmándanatynyn aıtty. "Men qyzyma qol kótergen emespin", - deıdi ol. 

Ata-anasynyń arasynda taǵdyry talasqa túsken 11 jastaǵy oqýshynyń máselesi endi sotta sheshiletin bolady. Óıtkeni, qyzdyń anasy buǵan deıingi sottyń sheshimimen kelispeı, appelásıalyq shaǵym túsirgen. 

Usynǵan: Nazerke Labıhan