Prezıdenttikke Qasym-Jomart Toqaev kelgeli biraz jerde bılbordtar ózgertilip,  Memleket basshysynyń qanatty sózderi qala kóshelerine ilinip, Prezıdentti nasıhattaý jap-jaqsy beleń alyp keledi.  Biraq  Qasym-Jomart Kemeluly, bir ǵana Aqtaý qalasynda óziniń 14 sýreti ilinip turǵanyn estip, «maǵan mundaı propoganda kerek emes» degendi qadap aıtty. Biraq oǵan qoıatyn bizdegi atqaminerler me?! Kersinshe, «aımaqqa Prezıdent keledi» dep jantalasyp, jyrtyǵyn jamap-jasqap jatqandardyń qarasy barshylyq.

Almaty oblysyny qarasty Úshtóbe qalasynda da dál qazir osyndaı qarbalas bolyp jatyr. Prezıdenttiń ákesi Kemel Toqaev Úshtóbe qalasy, Qaratal aýylynda  dúnıe kelgen.  Aldaǵy ýaqytta Prezıdent ákesiniń basyna táý etip, halyqtyń jaı-kúıimen tanysýy ábden múmkin bolǵandyqtan, Úshtóbe qalasynyń ákimdigi Prezıdenttiń jolyn tosyp, eki kózi tórt bolyp júr. Qala turǵyndarynyń aıtýynsha, sońǵy kezde oblys ákimdiginen laýazymdy qyzmetkerler Úshtóbege, Qaratalǵa jıi kele bastaǵan.  Úshtóbedegi basty kóshelerdiń  sharbaqtar jańartylyp,  kóshe shamdary ornatylǵan. Qaladaǵy Kemel Toqaev atyndaǵy mektepti kóktemniń sýyq kúnderine qaramaı syrlap, barynsha ádemilenip qoıǵan. Kósheniń sharbaqtaryn da jergilikti ákimdik ózderi birdeı túske boıap, syrlap berip jatyr. Tipti muǵalimder men jergilikti ákimdik qyzmetkerleri kóshe boıyn da ózderi tazalap, qorǵandardyń syrtyna deıin ózderi tazalap berip jatqan kórinedi. Al keshe tipti qalalyq aýrýhanyń da ishi-syrty syrlanyp, retke keltirilgen.

Úshtóbe qalasynyń turǵyny Saıa Esenbekovanyń aıtýynsha, qaladaǵy 145 oryndyq aýrýhananyń dálizi men syrtyn syrlap tastalǵan. «Ásirese jansaqtaý bóliminiń dálizin syrlap qoıýýy aqylǵa syımaıdy»,-deıdi turǵyn.

«Úshtóbe qalasynda qazir qarbalas. "Prezıdent keledi" dep naýryzdan bastalǵan jantalas áli jalǵasyn taýyp jatyr. Muǵalimder apta saıyn senbilikke shyǵady. Kemel Toqaev atyndaǵy mektepti kóktemniń sýyǵyna qaramaı syrlap, onda balalardyń demikpesi ustap, alergıalary qozyp jedel járdem shaqyrǵan kezder boldy. Al endi aýrýhanaǵa kelsek, qalalyq aýrýhanany syrlap tastaǵan. Munda naýqastar jatyp em alady. Kúndizgi stasıonar degen bar. Qan qysymym kóterilip kelip edim, kersinshe, boıaýdyń ıisinen basym odan ári aýyryp qaıtyp baramyn. Osy bizde nege Prezıdent, ákim keledi dese jantalasady?! Mynadaı ıisten naýqastar kerisinshe, aýrýdyń ústine aýrý jamap alady emes pe?!» - deıdi qala turǵyny Saıa Esenbekova.

Máseleniń mán-jaıyn anyqtaý úshin Úshtóbe qalalyq aýrýhanasyna telefon shaldyq. Bizge pikir bildirgen Úshtóbe qalasy aýrýhanasynyń bas dárigeriniń orynbasary Aıdana Janbaevanyń aıtýynsha, «bul Prezıdent keledi» dep jantalasý emes. Jylda oryn alatyn jaǵdaı» deıdi maman.

«Qystan shyqqannan keıin osylaı aýrýhanany syrlap tazalyq jumysyn júrgizip jatqanymyz ras. Osylaı mamyr aıyna deıin tazalyq jumystaryn júrgizemiz. Aýrýhananyń dálizi, syrty boıaldy. Jansaqtaý bólimi jaqty da syrlap qoıdyq. Halyqqa qyzmet kórsetilip jatyr. Muny kóktemgi tazalyq jumystary dep sanaý kerek» dedi aýrýhana basshysynyń orynbasary Aıdana Janbaeva.

 Dese de, qazir Úshtóbede «boıaýshy, boıaýshy degenshe saqalyn boıapty» degen maqal «hıt»  bolyp tur. Bul rette qala turǵyndary «ákimder halyqtyń jaıyn emes, ózderiniń kreslolaryn oılap joǵarydan bireý kele jatsa sonsha qarbalasady. Sonda eshkim kelmese, barlyǵy tozǵan qalpynda tura bere me, Prezıdent keletin kezde ǵana jyrtyǵymyz jamala ma?! Onda Memleket basshysy Qazaqstandaǵy árbir aýdandy, aýyldy jeke ózi aralap shyqsyn. Sonda bálkim jaǵdaıymyz túzeler» dep ashynady.

Qarlyǵash Zaryqqanqyzy