Tanymal matematık Asqar Jumadildaev "Shyńǵys hannyń qazaq bolýy mańyzdy ma?" degen suraqqa jaýap berdi dep jazady Qamshy.kz aqparat agenttigi. Bul týraly Asqar Jumadildaev "Parasat maıdany" baǵdarlamasynda aıtqan. 

"Shyńǵys handy bir mınýt qazaq dep esepteıik. Ne ózgeredi sonda? Marsta alma gúldeıdi me? Iýpıterde jel tura ma?  Eki jerdegi eki bes bola ma? Álde sizden múıiz shyǵa ma? Múıiz shyqsa qansha santımetr shyǵady? Men osy máseleni túsinbeımin. Siz artqa qarap júrmeńiz, kerisinshe alǵa qarap júrińiz. Búgingini oılańyz, erteńgini oılańyz. Biz mysaly máńgilik el degendi jıi aıtamyz. Máńgilik el degen qansha jyl? 1 jyl, 10 jyl ma? Qalaı biz ol kezge deıin ómir súremiz? Meniń oıymsha, bilim izdeseńiz siz erteńginiń tirligimen shuǵyldanyńyz. Eger siz bireýdi moıyndatamyn deseńiz tehnologıa jasańyz. Tehnokrat bolyńyz! Siz japonnyń Tayota-sy sekildi kólik oılap tabyńyzshy. Bul qolyńyzdan kelmese motosıkl nemese velosıped oılap tabyńyz. Ol da qolyńyzdan kelmese dóńgelek oılap tabyńyz. Sonda ǵana sizdi moıyndaıtyn bolady. Siz tarıhym tereń dep aıtasyz. Biraq tarıhyńyz ózińizden basqa eshkimge kerek emes. Siz tarıhym tereń emes dep aıtqan qaı eldi bilesiz? Siz meniń tilim baı emes dep aıtqan qaı eldi bilesiz? Sondyqtan tilim baı, tarıhym tereń degenniń bári bos sóz! Biraq budan keıin ózińizden kemshilik izdemeńiz. Siz budan durys qorytyndy shyǵaryńyz. Sóz ben istiń alshaqtyǵy bar. Mysaly japondar úshin sóz ben istiń ara qashyqtyǵy 1 sm. Germanıa úshin — 2sm. Al amerıka úshin 5 sm delik. Al qazaq úshin qansha sm? Meniń oıymsha myńdaǵan shaqyrym sekildi. Sóz bir bólek al isi ekinshi bólek", - deıdi Asqar Jumadildaev. 

Usynǵan: Ásel Bolatqyzy