30 jyl boıy bıliktiń bıik shyńynda júrgende myǵym minezinen bir taımaǵan Nursultan Nazarbaev "Nur Otan" sezi aıaqtalar sátte erekshe tolqyp, kóz jasyna erik berdi. Elbasynyń bir sáttik emosıasyn búkil áleýmettik jeli lezde ilip áketti. Únemi ózin jınaqy ustaıtyn Tuńǵysh Prezıdenttiń bul joly kóńili nege bosady? Bul jaıynda Qamshy.kz aqparat agenttigi Eýrazıa arnasynyń deregine súıenip habarlaıdy. 

Bir aı buryn tógilgen kóz jasy. Elbasy Prezıdenttik ókilettigin toqtatamyn degende shyǵyp edi. Basqany qaıdam, keı depýtattyń kóńili bosap, kemseńdegeni qoǵamda qyzý sóz bolǵan edi.

Al kúni keshe ótken «Nur Otan» partıasynyń sezinde Elbasynyń qatty tolqyp, kóz jasyna erik berip, kóńili bosaǵanyn kórdik.

Bir sáte kóz jasyna erik bergen lıderler buǵan deıin de bolǵan. Máselen, Amerıkanyń burynǵy prezıdenti jýrnalıser aldynda emosıasyn tyıa almasa, Reseı basshysy Pýtın saılaýda jeńiske jetkende tamaǵyna óksik tyǵylyp, kózinen jas parlaǵan edi. 

Psıholog mamandardyń pikirinshe,  buǵan atqarylǵan qyzmettiń áseri zor. Sebebi, el basqaryp otyrǵan adam ózin temirdeı myǵym ustaı almasa halyq senýden qalatynyn aıtady. Al, saıasattan alshaqtamasa da, atqarǵan eńbeginiń jemisin kórip, biraz júgi jeńildegen adamnyń emosıaǵa berilýi zańdy qubylys deıdi. 

«Eger sezimin bildire berse,  qobaljysa, renjise, jylasa , onda halyq oǵan senimsizdikpen qaraıdy. Óıtkeni bılik basynda otyrǵan adam halyqtyń senimin uıalatý úshin ol bar emosıasyn syrtqa kórsetpeıdi. Sonshama ishte ustaǵan bastan keshýlerin, sezimderin múmkin osy bir qımastyq sezimimen syrtqa shyǵarǵan da bolýy múmkin», - deıdi psıholog Gúlzıra Aqynbek.

Tarıhshylardyń da paıymy osyǵan jaqyn. Biraq daǵdarystan alyp shyǵyp, eldiń eńsesin kóterdim, maqsatyma jettim,- dep qýanyshtan jylaýy da múmkin deıdi. 

«Sonaý 91-shi jyldary «Men óz halqyma altyn taýlardy ýáde bere almaımyn, bir-eki aıdyń ishinde ómirimiz jaqsaryp qalady dep ýáde bere almaımyn, biraq óz halqym úshin basymdy tigýge daıynmyn»degen ýádesinen. Bul óziniń eńbegin tolyǵymen óziniń ómirin Qazaqstannyń bolashaǵy úshin tókken adamnyń sondaı bir kóńiliniń belgisi. Bul ár adamnyń qolynan kele bermeıdi», deıdi tarıh ǵylymynyń kandıdaty Botagóz Qaıypova.

90-shy jyldardyń basy edi. Telearnalardan Nursultan Nazarbaev sózin, Bekbolat Tileýhan ánin jazǵan týyndy kórsetile bastaıdy. Dál osy án shyrqalǵanda Elbasy kózine jas alady eken. Muny ánniń avtory aıtyp otyr.

«Bul birinshi ret emes, eń birinshi osy ándi 1996 jyldyń 8 maıynda Alataýdyń baýyrynda bir shatqalda turyp estigeni bar-tuǵyn. Sonda birinshi estigende, osy óleńdi ánimen estigende kózine jas kelgen Elbasymyzdyń. Odan keın birneshe jınalystarda, konsertterde bolǵan kezde elge qarap otyrǵan joq, sahnaǵa qarap otyrǵan kezde de tolqyǵan, men kýá boldym», - deıdi QR Parlament Májilisiniń depýtaty Bekbolat Tileýhan.

Bekbolat Tileýhan «Ózim bir dáýrenniń ótkenin sezinip jyladym»  dese, Elbasy bir sheti saıasatker, bir sheti shyǵarmashyl adam bolǵan soń kózine jas aldy dep otyr.

«Laýazymyn bosatyp bergen kezde de aıtty «Qazaqstan senderge amanat»,- dep, «senderge tapsyrdym»,- dep. Sonda Táýelsizdiktiń qadirin bireý bilse, ol Nazarbaev biledi. Ol tolqýdyń sebebin el-jurt túsinýge tıisti. Bul bir jaǵynan shyǵarmashylyqqa jaqyn adam bolǵannan keıin, onyń júreginiń jumsaqtyǵynyń ózinde de qazaqtyń sıpaty jatyr», - deıdi Bekbolat Tileýhan.

Qalaı degenimen, 23 sáýirde bolǵan jıyn kóptiń esinde áli uzaqqa saqtalatyn tárizdi. Kóbine ony dál osy, emosıaǵa toly kadrmen baılanystyratyna kúmán joq.

Usynǵan: Nazerke Labıhan