Arys qalasyndaǵy apatty jaǵdaıdy kózben kórgen Áıgerim Ýálıeva Qamshy.kz aqparat agenttigine jarylys oqıǵasy týraly pikir bildirip, birshama aqparat berdi.

"Biz jarylysty kózben kórdik. Úıdiń ishi dirildep, terezeler syndy. Jelide 2 adam qaıtys boldy dep jatyr. Biraq, bul – halyqtyń pikirinshe, múldem jalǵan aqparat. Jolda kólik astyna túsip ketip jatqan balalar boldy. Jan-jaqtaǵy qala turǵyndarynyń aıtýynsha, 1000-nan astam adam qaıtys boldy. Biraq muny naqty fakt deýge kelmeıdi. Joldasymnyń týystary jaǵynan, ózimniń týystarym jaǵynan iz-tússiz ketken adamdar bar. Óli-tirisin bilmeımiz", - deıdi oqıǵa kýágeri.

Áıgerim Ýálıevanyń aıtýynsha, jol-kólik keptelisi sumdyq bolǵan. Shymkentke bir jarym saǵatta jetetin jurt keshe on saǵatqa jaqyn ýaqytta ázer ilinipti.

Radıasıa bolmady degen fakt – ótirik

"Qalada alǵash jarylys bolǵan kezde murynymyzǵa kúlimsi ıis keldi. Al garnızon qaladan alty-jeti shaqyrym alysta tur. Ystyq lep soqty. Bul radıasıa ma, basqa bilmeımin. Biraq biz Shymkentke ketip bara jatqan kezde, Arys qalasynan otyz shaqyrymdaı uzaǵanda da snarádtar kólik aınalasyna túsip jatty", - deıdi ol.

Arystyqtar panalaǵan Aqadyr da órtendi

Qalada jarylys bolǵan sátte turǵyndar shahar syrtyna qaraı qashty. Jotalarǵa shyqqan olar Aqadyr degen jerdi mekendegen. Adamdardy evakýasıalap bol bergen sátte dál sol Aqadyrǵa snarád túsip, órtke oranypty. Abyroı bolǵanda ol jerden zardap shekkender joq.

Halyq narazy

Arystaǵy jaǵdaı týraly pikir bergen kýáger Áıgerimniń aıtýynsha, halyqtyń basym kópshiligi ınternettegi jańalyqtarǵa, naqty sandarǵa kóńilderi tolmaıdy. Olardyń oıynsha, barlyq faktiler kishireıtilip berilýde. Sondaı-aq, evakýasıalanǵan adamdar arasynda mıtıń uıymdastyrýǵa talpynyp júrgender de bar.

Eskertý!

Qamshy.kz aqparat agenttigi kýáger sózin aına-qatesiz berdi.