Kúni keshe, Almaty oblysynyń eń taýly mekeni Raıymbek aýdannyń kásipkerleri jalpy somasy 60 mln teńgeni quraǵan 18 baspanany kóp balaly jáne turmysy tómen otbasylarǵa syıǵa tartty. Osymen, Jetisý jomarttary 90-ǵa jýyq otbasyny úıli qylǵan. 

Jyl basynan oblys ákimi Amandyq Batalov  bastaǵan qaıyrymdylyq marafony Raıymbek aýdanyna da jetti. Aýdanda jalpy  829 kóp balaly otbasy úı kezeginde tursa, onyń ishinde az qamtylǵany 423. Búginde sonyń 18 –i úıli boldy. Aýdan ákimi Jolan Omarovtyń qatysýymen tabys etilgen qýanysh kilti eń aldymen Saryjaz aýylynyń turǵyny, 7 balanyń anasy Jazyqbaeva Sholpanǵa berildi.

«Elbasy «Nur Otan» partıasynyń XVIII sezinde «kóp balaly jáne turmysy tómen otbasylarǵa degen qoldaýdy kúsheıtý kerektigin» aıtqan bolatyn. Osy tapsyrma aıasynda, oblys ákiminiń ózi jyl basynda qaıyrymdylyq marafonyn bastap ketti. Endi sol qýanysh toıy bizdiń aýylǵada kelip jetti. Osy úıdi satyp berip jatqan aýdan kásipkerlerine zor alǵysymdy bildiremin»  - deıdi, aýdan basshysy.

Eń kishisi eki jasar januıanyń eki asyraýshysy da jumyssyz. 7 balanyń eń úlkeni stýdent Alfıanyń aıtýynsha, myna 6 bólmeli úı keń saraıdaı eken.

«Baýyrlarym ana bólmeden, myna bólmege asyr salyp oınap júr. Olarǵa bul úı keń saraıdaı, sebebi biz  buryn 1 bólmeli, úı deýge kelmeıtin jerde turǵan edik» - dedi, kishkentaı qyz kózine jas alyp.

Kelesi úıler, Qaqpaqty, Sarybastaý, Qarasaz, Shálkóde, Jambyl, Saryjaz, Tegistik, Súmbe  aýyldary men aýdan ortalyǵy Narynqolda tabys etildi. Úı alǵan 18 otbasynda keminde 7-8 baladan, 3 otbasyda múmkindigi shekteýli jandar bar, 4- i asyraýshysynan aıyrylǵan jáne kóbisi jumyssyz.

Merýert Mahmutjan, Almaty oblysy