Árbir  jas  el  bolashaǵy úshin jasalyp  jatqan  ıgi  bastamalardan tys  qalmaýy  tıis.  El  ulany  retinde  qoǵamdyq  ózgeristerge  ózinshe  ún  qosyp, ornyqty oı  aıta  bilý – perzenttik paryzdarynyń  biri.  Sol  sebepti  QazUÝ,  zań  fakúltetiniń  «Eltutqa»  pikirtalas  uıymynyń  uıytqy  bolýymen   ýnıversıtetaralyq   «Qazaqstan-2050» strategıasynyń  mán-mańyzy atty   pikirsaıys  týrnıri  ótt.  Pikirsaıysqa  elimizdiń bes  joǵarǵy oqý  oryndarynyń  komandalary,  atap  aıtqanda  Qarjy polısıasy akdemıasy, T.Rysqulov atyndaǵy QazEÝ,  Abaı atyndaǵy QazUPÝ, M.Áýezov atyndaǵy OQMÝ  jáne Ál-Farabı atyndaǵy QazUÝ  qatysty.

Pikirtalas týrnırinde  saıyskerler  ««EHRO-2017» kórmesiniń Qazaqstanda ótkizilýi  aqtalady ma?», «Qazaqstan-2050» strategıasynyń  máni  qandaı?», «Álemdik  kúsh  batystan  shyǵysqa  qaraı  aýysyp jatyr ma?»  degen sekildi  taqyryptar tóńireginde  pikir  almasyp,  ornyqty  oılaryn  aıtty.  QazUÝ-dyń «Altyn sapa»  komandasynyń  spıkeri  Aldońǵarov  Quralbek  «EHRO-2017» kórmesi  týraly: «Bul kórmede  qatysýshy ár bir el  óziniń  ınovasıasyn,  jańa  tehnologıasyn   alyp kelmek. Sheteldermen tájirıbe almasýǵa  múmkindikter  týady.  Sonymen  qatar, tarıhtan belgili  osy  kórmeniń  ótkizilýi  kóptegen iri  qalalardyń  úlkeıip,  álemge  tanylýyna  áser etti. Sol sekildi  Astana  qalasynyń  da tanylýyna,  ınfrastrýktýrasynyń  jaqsarýyna, týrısik oryndarymyzdyń  jandanýyna,  jańa ǵımarattardyń  salynýyna  alyp  keledi.  Bir sózben  aıtqanda  elimizdiń  abyroıyn kóterip, ekonomıkamyzdyń  ósýine  oń áser etedi», -  dese,  qarsy  toptyń  spıkeri,  Qarjy  polısıasy akademıasynyń  stýdenti Baıtenov  Bernar:  «Bizdiń  mundaı  iri  jobany  jaýapkershilikke  alǵanymyzben,  ony  óz  deńgeıinde ótkize  alatynymyzǵa  senimdi emespiz.  «EHRO»   óte  úlken  joba,  úlken  qarjy men  qaraqetti  qajet etedi.  Al munyń  barlyǵyna  bizdiń  eldiń  ekonomıkasy  qanshalyqty  qaýqarly?» ,− deıdi.

Eki  kúnge  sozylǵan  týrnır Qarjy polısıasy akdemıasy men Ál-Farabı atyndaǵy QazUÝ komandalarynyń  teń  túsýimen aıaqtaldy.  Stýdentter  marapattalyp,  syı-qurmet jasaldy. QazUÝ, zań fakúltetiniń  Qylmystyq  quqyq, qylmystyq is júrgizý jáne krımınalısıka  kafedrasynyń  meńgerýshisi  Djansaraeva  Rıma  Erenatqyzyna  jáne  «Eltutqa»  pikirtalas  uıymynyń  tóraǵasy  Ámirbek Asqarǵa Qarjy  polısıasy akademıasy  atynan arnaıy  «Alǵysqat» tabys etildi.

Mundaı  týrnırdiń ótkizilýi  elimizdiń  belsendi   jastaryn  bir ortaǵa biriktirýde, óskeleń urpaqtyń  eldik  isterge kelgende  yntymaqtastyqta  bolýyn jaqsartýda  mańyzy zor. Bul  týrasynda  zań  fakúltetiniń  dosenti  Orynbasar  Tilepbergenov: «Bul  týrnır  Qazaqstandaǵy  joǵarǵy   oqý  oryndaryndaǵy  bolashaq  sapaly kadrlardy daıyndaý  maqsatynda jasalyp jatqan  sharalardyń  biri.  Jastarymyzdyń eldiń  saıası  jaǵdaıyna, ekonomıkalyq  damýyna  qosqan belgili  bir úlesi  dep  qabyldaý kerek» ,− dep túıindedi  sharany.

Janıa  Ábdibek