Erteń 27-sáýir kúni «Saryarqa» kınoteatrynyń aýlasynda bolatyn jıynǵa qala turǵyndaryn shaqyrǵan únparaqtar qaptap ketti. Osy oqıǵaǵa qatysty mán-jaıdy bilmek úshin sharany uıymdastyrý tobynyń bir múshesi – Marat ÝATQAN myrzaǵa telefon arqyly habarlasqan edik:

-Aǵa, naýqandaryńyz qabyl bolsyn! Qandaı máselelerdi kóterip jatyrsyzdar?

-Biz negizinen qordalanǵan áleýmettik máseleler boıynsha jıyn ótkizbekshimiz.

- Máselen?

-Máselen, áýeli JKH tarıfteriniń ósýine tosqaýyl qoıýdy talap etemiz. Áıelderdiń zeınetke shyǵý jasyn burynǵy sheginde qaldyrý, analar men balalarǵa laıyqty járdem aqy taǵaıyndaý, Ár otbasyǵa tegin berilýge tıisti 10 sotyq jer telimi degen sıaqty jıyny 45 túrli másele bar.

-Ákimdikten ruhsat aldyńyzdar ma?

-Aldyq.

-Tosqaýyl bolǵan joq pa?

-Basynda syltaýlar aıtyldy. Aqyry kelisti. Biz jıynǵa qala turǵyndaryn ǵana emes bılik ókilderin de shaqyryp otyrmyz. Baıqaýymyzsha, olar  da jybyrlaı bastaǵan syńaıly.

-  Qalaı?

-Keshe Elbasy Almatyǵa kelipti dep estidik. Ózimen birge birneshe mınıstrdi de erte kelgen kórinedi. Arasyndy Áleýmettik qorǵaý mınıstri – Serik Ábdenov te bar. Sol Ábdenov myrza búgin saǵat 14-te «Demokrattar úıinde» qoǵam belsendisi – Irına Savostına hanymmen kezdesetini týraly jańa ǵana habar aldym. Soǵan qaraǵanda, azamattyq uıymdar kótergen másele bıliktiń ózin de selt etkizgen kórinedi. Bılik bizden emes shyndyǵyna kelgende halyqtyń qaharynan qorqyp otyr. Eger halqymyz óziniń zańdy quqyqtaryn saýatty túrde tize qosyp, talap ete biletin bolsa, mınıstr emes Prezıdenttiń ózi de halyqpen mámilege kelýge májbúr bolady. Halyq – alapat kúsh ekenin endi ǵana túsine bastaǵan syńaıly.

-Qalaı oılaısyz, bılik Sizdermen mámilege kele me?

-Bılikti mámilege túrli azamattyq uıymdar arqyly halyqtyń ózi keltiredi.

Áńgimelesken Nurǵalı Nurtaı