«Jańa esimderdiń on jyldyǵy» uranymen ótken festıváldi QR Tuńǵysh Prezıdenti – Elbasy qory uıymdastyrsa, oǵan Almaty ákimdigi qoldaý kórsetti.

Festıvál qatysýshylary men onyń qonaqtaryn qala ákimi B.Saǵyntaevtyń atynan shahar basshysynyń orynbasary Erjan Babaqumarov quttyqtady.

– Jastardyń arasynda óner men mádenıetti jan-jaqty damytýdy maqsat etken festıvál óziniń on jyldyǵyn atap ótýde. Atalǵan shara ár eldiń jastarynyń basyn qosyp keledi. Jyl saıyn festıválge qatysýǵa nıet bildirýshiler qatary keńeıýde. Bul – kópshilikke óz talantyn pash etip, shyǵarmashylyq kókjıegin keńeıtýge jáne jańa tájirıbe alýǵa tamasha múmkindik, – dedi Almaty qalasy ákiminiń orynbasary.

Jyl saıyn festıvál aıasynda ár eldiń tanymal mádenıet qaıratkerleriniń qatysýymen elimizdiń jas mamandary men shyǵarmashylyq oqý oryndarynyń stýdentteri úshin túrli shyǵarmashylyq kezdesýler, sheberlik synyptary, dárister, trenıńter men semınarlar ótedi.

Osy ýaqyt ishinde «JasSTAR»-ǵa senarıst ári kınorejısser Egor Konchalovskıı, mýzykant jáne prodúser Baıǵalı Serkebaev, Parıj Operasy ulttyq orkestriniń dırıjeri Fılıpp Iýı, tanymal sýretshi-stılıst M.Lamın, «Vırtýozy Moskvy» orkestriniń solısi, birinshi skrıpkashy Alekseı Lýndın keldi.

Bul festıválde Broadway musical shows formatyndaǵy múzıkl ótti. «JasSTAR» qatysýshylarynyń jas kólemi ár túrli. Elimizdiń shyǵarmashyl jastarynyń úzdik ókilderi Almatynyń basty konserttik zaly – Respýblıka saraıynyń sahnasynda álemdik múzıklderdiń úzdik hıttaryn oryndady. Festıvál baǵdarlamasynda «Velıchaıshıı shoýmen», «Krasavısa ı chýdovıshe», «Romeo men Djýletta», Chicago, «Dostar serti», «La-La Lend», Mamma mia sıaqty múzıklderdiń kompozısıalary oryndaldy.