Facebook jelisinde Aısultan Rahat jarıalaǵan jazbalardyń artynda shetelde turatyn opozısıalyq saıasatker Muhtar Ablázov turǵan bolýy múmkin.

Oppozısıoner facebook-tegi paraqshasynda "Men, Aısultan Nazarbaev. Paraqshamda jarıalanǵan jazbalardy ózim jazdym. Bul óz qalaýym, oǵan eshkim yqpal etpedi. Bul meniń akkaýndym, meniń oıym, meniń talaptarym" delingen post jarıalap, kóp uzamaı ony óshirgen.

Onyń bul jazbasyn bloger Denıs Krıvosheev skrınshot jasap úlgergen.

Bloger óziniń paraqshasyna atalǵan sýretti jarıalaı otyryp, "endi barlyqtaryńyzǵa túsinikti bolǵan shyǵar. Muhtar akkaýndtardy shatastyryp aldy ma? Aqparatty ol dereý óshirdi. Biraq skrınshot degen uly nárse ǵoı" degen jazba qaldyrǵan.

Muhtar Áblázov sońǵy jazbasynda halyqqa Aısultan Rahattan facebook paraqsha ózine tıesili ekenin dáleldeý úshin jazbalardyń barlyǵyn óziniń jazǵanyn málimdeýdi aıtyp, "Men, Aısultan Nazarbaev. Paraqshamda jarıalanǵan jazbalardy ózim jazdym. Bul óz qalaýym, oǵan eshkim yqpal etpedi. Bul meniń akkaýndym, meniń oıym, meniń talaptarym" dep jazýyn suraǵan.

Atalmysh mátin jazylǵan jazbanyń Áblázov paraqshasynda jarıalanyp, uzamaı óshirilýi Aısultan Rahattyń paraqshasyn Áblázov paıdalanyp otyrǵan bolýy múmkin degen oıdy týdyrdy.

Buǵan deıin aqparat jáne qoǵamdyq damý mınıstri Dáýren Abaev Aısultan Rahat daýly jazbalardy áldekimderdiń yqpalymen jarıalaǵan dep málimdegen.