Germanıada Qazaqstan azamaty koronavırýs juqtyrdy, onyń otbasy karantınge jatqyzyldy, dep habarlady Qazaqstan syrtqy ister mınıstrligi.

Vedomstvo taratqan habarlamaǵa qaraǵanda, koronavırýs juqtyrǵan azamat –Germanıadaǵy Qazaqstan elshiliginde jumys isteıtin dıplomattyń ákesi.

"Germanıadaǵy Qazaqstan elshiligindegi dıplomattarymyzdyń birine ata-anasynyń qonaqqa barǵanyn rastaımyz. Olar Eýropada jeke saparmen júrgen. Birneshe kúnnen keıin dıplomattyń ákesinen koronavırýs juqtyrý belgileri baıqalyp, aýrýhanaǵa jatqyzyldy. Qazirgi ýaqytta naýqastyń jaǵdaıy jaqsaryp, jeke palatadan jalpy palataǵa aýystyryldy. Onyń áıeli men uly nemis dárigerleriniń baqylaýynda karantınge alyndy" dedi Syrtqy ister mınıstrliginiń resmı ókili Aıbek Smadıarov.

Al Densaýlyq saqtaý mınıstri Eljan Birtanov Nur-Sultandaǵy brıfıńte "Germanıanyń Berlın qalasynda Qazaqstannyń bir azamatyna koronavırýs juqtyrǵan degen aldyn ala dıagnoz qoıylǵan. Qazirge deıin bizde bar aqparat osy ǵana. Qazaqstanǵa kelgen 12 adam sol kisiniń janynda bolǵan. Qazir olar aýrýhanada karantınde jatyr. Al álgi azamat qazir Germanıada. Biz bul aqparatty tolyq rastaı almaımyz. Biraq qazir bizde Germanıada bir azamatymyzǵa vırýs juqqany jaıly aqparat bar" dedi.

Germanıadaǵa qazaqstandyqty qosqanda eldiń tórt azamatynan koronavırýs tabylyp otyr. Búgin, 13 naýryzda tústen keıin Almatyǵa Germanıadan ushyp kelgen eldiń eki azamatynyń koronavırýs juqtyrǵany anyqtylǵan bolatyn. Artynsha Mılannan (Italıa) Nur-Sultanǵa ushyp kelgen áıel adamnyń da vırýs juqtyrǵany habarlandy. 

Densaýlyq saqtaý mınıstri Eljan Birtanovtyń sózinshe, vırýs juqtyrǵan azamattar karantınge jatqyzylyp, olarmen baılanysta bolǵan adamdardy arnaıy mamandar tekserip jatyr.

Taǵy oqyńyz!

♦ Vırýsolog: Qazaqstanda koronavırýsqa qarsy preparattar jasaýǵa múmkinshilik bar