Koronavırýsqa baılanysty álem elderiniń statısıstıkasyn jarıalap otyratyn worldometers.info saıtynyń 10 shildedegi dereginshe, dúnıejúzinde COVID-19 juqtyrǵandar sany 12,4 mıllıonǵa jýyqtaǵan. Vırýstan 557 myńnan astam adam qaıtys boldy. 

İndetten eń qatty zardap shekken el – AQSH. Dúnıejúzi boıynsha vırýs juqtyrǵandardyń tórtten biri osy el úlesinde. Sońǵy aqparatqa saı, elde 3,2 mıllıonnan astam adamǵa koronavırýs juqqan. Olardyń 135 myńnan astamy qaıtys boldy. AQSH halqynyń sany 331 mıllıonnyń ústinde ekenin eskersek, el halqynyń shamamen bir paıyzy koronavırýsqa shaldyqqan deýge bolady. 

212 mıllıonnan astam halqy bar Brazılıada 1,8 mıllıoǵa jýyq adam COVID-19 juqtyrǵan. Ólgender sany – 69 254. El prezıdenti Jaır Bolsanarýdan da 8 shilde kúni koronavırýs tabyldy. 

Juqtyrǵandar sany jóninen álemde úshinshi orynda turǵan Úndistanda COVID-19-ǵa shaldyqqandar sany 800 myńǵa jýyqtady. Elde 21 myńnan astam adam osy indetten kóz jumdy. 

Postsovettik elderdiń eń alyby Reseıde koronavırýs juqtyrǵandar sany 700 myńnyń ústinde. Qaıtys bolǵandar 10 myńnan asty. Reseı álemde vırýs juqtyrǵandar sany jóninen tórtinshi orynda tur. 

Koronavırýs qatty órship turǵan Brazılıamen bir materıkte – Ońtústik Amerıkada ornalasqan Perý men Chılıde de jaǵdaı aýyr. Bul eki elde de koronavırýs juqtyrǵandar sany 300 myńnyń ústinde. 

Sáýir, mamyr aıynda koronavırýstan qatty zardap shekken Ispanıa, Italıa, Ulybrıtanıa memleketterinde jaǵdaı turaqtalyp keledi. Al Meksıkada kerisinshe, vırýs órship bara jatyr. Elde sońǵy táýlikte 7 myńnan astam adamnan COVID-19 tabyldy. Vırýs juqtyrǵandardyń jalpy sany 282 myńnyń ústinde.  

Qazaqstan koronavırýs juqtyrǵandar sany jóninen dúnıejúzilik statısıkada kún saıyn bir saty joǵarylap jatyr. Qazir 31-orynda. Sońǵy resmı aqparatqa saı, elde indetke shaldyqqandar sany 55 myńǵa jýyqtady. Qazaqstannan bir oryn joǵary turǵan Belgıada 62 myńnan astam adamnan COVID-19 tabylǵan.