Ulybrıtanıalyq Daily Mail basylymy "Qytaı jáne Ulybrıtanıa densaýlyq saqtaý mamandary Qazaqstanda taralyp jatqan belgisiz pnevmonıanyń is júzinde COVID-19 ekenin aıtty" degen aqparat taratty. Bul týraly Qamshy tilshisi habarlaıdy.

Álemdik jetekshi buqaralyq aqparat quraldary "Qazaqstanda ólim mólsheri koronavırýstan da joǵary belgisiz pnevmanıa paıda boldy" dep jarysa aqparat jarıalaǵannan keıin, Londonda shyǵatyn Daily Mail basylymy qytaılyq jáne ulybrıtanıalyq medısına mamandarynan suhbat alǵan. 

– Búgin keshte Beıjińdegi Qytaıdyń bas epıdemıology Ý Szúnú Qazaqstanda taralǵan "belgisiz pnevmonıa" epıdemıologıalyq turǵydan COVID-19 dep sanaıtynyn jetkizdi, – dep habarlady Daily Mail.

Bas epıdemıolog Qazaqstan týraly jańalyqtardy baıqaǵanyn jáne ınternetten tıisti aqparattardy oqyǵanyn aıtqan.

Ol sonymen birge Qazaqstandaǵy "belgisiz pnevmonıadan" bolǵan ólim-jitim deńgeıi COVID-19-ǵa uqsas ekenin jetkizgen.

Ulybrıtanıalyq mamandar da Qazaqstandaǵy jaǵdaılardyń anyqtalmaǵan COVID-19 ınfeksıasy dep senetinin jarıalaǵan. Ýorvık ýnıversıtetiniń vırýsology jáne onkology profesor Loýrens Iang MailOnline-ǵa suhbat berip, ólimge ákeletin "belgisiz pnevmonıanyń" COVID-19-ǵa qatysy joqtyǵyna sený qıyn ekenin málimdegen.

Buǵan deıin qazaqstandyq neırohırýrg dáriger Myńjylqy Berdiqojaev "pnevmonıadan qaıtys bolyp jatqan adamdardyń 99 paıyzynyń ólimine koronavırýs sebep" dep sanaıtynyn aıtqan.

Juma kúni Dúnıejúzilik densaýlyq saqtaý uıymy Qazaqstandaǵy "belgisiz pnevmonıany" is júzinde anyqtalmaǵan COVID-19 dep málimdegen. 

Al Qazaqstannyń densaýlyq saqtaý mınıstri Alekseı Soı kerisinshe "2020 jyly pnevmonıadan 1172 adam qaıtys boldy" dep málimdegen. Alekseı Soı keltirgen derekke saı, pnevmonıadan qaıtys bolǵandar koronavırýs óliminen bes esege kóp, sebebi resmı statısıka boıynsha qazirge deıin Qazaqstanda COVID-19-dan kóz jumǵandar sany 264.

Oǵan qosa, 3 shilde kúni QR bas sanıtar dárigeri Aıjan Esmaǵambetova 2020 jyldyń alǵashqy alty aıynda 1772 adamnyń, maýsymda 628 adamnyń pnevmonıadan qaıtys bolǵanyn aıtqan. Bul esep boıynsha, pnevmonıadan kóz jumǵandar COVID-19-dan qaza tapqandardan 7 ese kóp.

Osy derekterge baılanysty, ıaǵnı resmı statısıkalar boıynsha, pnevmonıa ólim-jitim mólsheri COVID-19-dan kóz jumǵandardan bes ese, tipti, jeti esege deıin kóp bolýyna baılanysty sheteldik iri BAQ-tar "Qazaqstanda ólim mólsheri koronavırýstan da joǵary, qaýipti vırýs tarap jatyr" degen aqparatty jarysa taratty. Tipti, keıbir elder azamattaryna Qazaqstannan abaılaý týraly eskertýler jasaǵan.