Qazaqstan Syrtqy ister mınıstrliginiń baspasóz hatshysy Aıbek Smadıarov Eýropa parlamentiniń Qazaqstandaǵy saıası jaǵdaıdy synaǵan "qarary túsinbestik týdyratynyn" aıtady, dep habarlady QazAqparat.

Onyń aıtýynsha, mundaı qararlardy Eýropalyq parlament halyqaralyq kún tártibiniń túrli máseleleri boıynsha aıtarlyqtaı turaqty túrde qabyldaıdy.

Aıbek Smadıarov Eýropalyq odaqqa múshe memleketter prezıdenti Qasym-Jomart Toqaevtyń bastamasymen qolǵa alynǵan demokratıalyq reformalardy qoldaıtynyn alǵa tartady.

– Osy sebepti jańa qarardyń mátininde paıdalanylǵan málimetterdiń naqtylyǵyna qatysty Qazaqstanda túsinbestik týyndady. Eýroparlamenttiń birqatar músheleri elimizdiń damýyndaǵy ózekti úrdisterge qatysty oń pikirlerine qaramastan, ózderiniń partıalaryndaǵy ishki tártibine sáıkes osy qarardy qabyldaýǵa daýys berdi. Sonymen qatar obektıvti kózqarastaǵy birqatar eýrodepýtattar, atap aıtqanda Maksımıllıan Kra (Germanıa), Terrı Marıanı (Fransıa) jáne Tatána Jdanoka (Latvıa) Qazaqstandy belsendi qorǵady, – dedi ol.

Buǵan deıin Azattyq radıosy 11 aqpanda Eýropa parlamenti basym kópshilik daýyspen "Qazaqstandaǵy adam quqyqtaryna jónindegi" qarar qabyldaǵanyn habarlaǵan. Eldegi azamattyq qoǵam aıasynyń tarylýyn, adam quqyqtarynyń buzylýyn jáne saılaýdaǵy ádiletsizdikti synaıtyn qarardy daýys bergen 693 depýtattyń 598-i qoldasa, tek 43 depýtat qarsy shyqqan.

Qazaqstandaǵy básekesiz saılaý jáne belsendilerdi qýdalaý, saıası tutqyndar, túrmede azaptaý, sóz bostandyǵy máselelerine nazar aýdarǵan Eýro parlament depýtattary Qazaqstanǵa 20 talap qoıǵan.

Onda adamdardyń negizgi bostandyqtaryn qurmetteý, saıası ómirge qatysý, saıası plúralızm, saılaý komısıalarynyń beıtaraptyǵy, saılaý jáne saılaný quqyqtary, saılaý nátıjesin jarıalaý máseleleri aldymen aıtylady. Munymen birge depýtattar "quqyq qorǵaýshy belsendilerdi, dinı uıymdardy, azamattyq qoǵam uıymdary men kásipodaqtardy, jýrnalıser men saıası opozısıalyq qozǵalystardy saıası sebeppen qýdalaýdy toqtatyp, jurttyń saıası, dinı jáne basqa da kózqarastaryn erkin bildirýine jaǵdaı jasaýǵa, erkindikti qamtamasyz etý úshin beıbit jıyndar týraly zańdarǵa ózgeris engizýge" jáne saıası tutqyndardy dereý bosatýǵa shaqyrady. 

Buǵan qosa depýtattar áıelderge jasalatyn zorlyqpen tıimdi túrde kúresýge, ol úshin zańdy kúsheıtip, japa shegýshilerdiń bul týraly jedel habarlaýyna múmkindik beretin mehanızmderdi qalyptastyrýǵa úndeıdi. Sonymen birge depýtattar Qazaqstan úkimetin LGBT qaýymdastyǵynyń quqyqtaryn tolyq qorǵaýdy, olardy kemsitpeýge tolyq kepildik berýdi talap etti. Qararda Eýroparlament Qytaıdyń Shyńjań aýdanynda qaıta úırený lagerlerinen qashyp kelgen qazaqtar men basqa da azshylyq ókilderiniń "qaýipsizdigin qamtamasyz etýge" shaqyrdy.