Bas prokýratýra "Aq jol" partıasy depýtattarynyń QazUÝ aýmaǵyndaǵy jer daýyna baılanysty saýalyna jaýap berdi.

Bas prokýratýra málimetinshe, 2012 jylǵy 30 qańtarda Almaty qalasy ákimdiginiń qaýlysymen ýnıversıtetke alańy 73,26 gektar jer ýchaskesin turaqty jer paıdalaný quqyǵy berilgeni anyqtalǵan.

2017 jylǵy 2 qazanda qala ákimdiginiń qaýlysymen jer alańy 1,8 gektarǵa azaıǵan.

"Ýchaskeniń azaıtylǵan bóliginiń 0,74 gektary "Omirex" JSHS-ǵa, 0,56 gektar jer Almaty Sý, Almaty jylý jelileri, Qazposhta, Qazaqtelekom sekildi komýnaldyq qyzmetterdiń qaramaǵyna, 0,52 gektar aýmaq Sh.A. Mustafaevqa ótken. Sh.A. Mustafaevtyń jer úlesi ýnıversıtettiń óndiristik úı-jaılaryn kópshilik saýda-sattyqta satyp alý nátıjesinde paıda boldy" delingen prokýratýra jaýabynda.

Bas prokýratýra Sh.A. Mustafaevqa tıesili osy úı-jaılardy ıelikten shyǵarý zańdy túrde júzege asyrylǵanyn, al 0,74 gektarlyq eki ýchaskeni "Omirex" JSHS-ǵa bergen kezde Almaty qalasynyń ákimdigi jer kodeksiniń 48 jáne 82-baptaryn buzǵanyn ári ýchaskeni saýda-sattyqsyz jáne olarǵa ýnıversıtettiń jer paıdalaný quqyǵy toqtatylǵanǵa deıin bergenin málimdedi.

"Anyqtalǵan buzýshylyqtardy quqyqtyq baǵalaý boıynsha ókilettik Aýyl sharýashylyǵy mınıstrliginiń Jer resýrstaryn basqarý komıtetine jatatynyn eskere otyryp, 19.03.2021 jyly Almaty qalasynyń prokýratýrasy olardyń mekenjaıyna tıisti tekserýdi uıymdastyrý týraly hat joldady "dep habarlady bas prokýratýra.

Bas prokýratýra jaýabyna Bas prokýrordyń mindetin atqarýshy  B.N.Asylov qol qoıǵan. Jaýap qosymshasyna Bas prokýror Ǵabıt Nurdáýletov 20-29 naýryz aralyǵynda eńbek demalysynda júrgeni jazylǵan.