Bir oblystyń nemese qalanyń ákimi jemqorlyqpen ustalypty degen jańalyqqa selt etpeıtin bolǵanbyz. Bizdiń tańqalystan titirkenetin talshyqtarymyz bundaı aqparatty qalypty dep qabyldaıdy. Ákim ba? Ol mindetti túrde jeý kerek, paraqor bolýǵa tıisti. Ulttyń nesibesiniń talan-tarjǵa túsip, kim kóringenniń qaltasyna súńgip ketýine biz miz baqpaımyz. «Jaqsy menen jamandy» paryqtaı almaıtyndaı bizge ne kórindi? Parqysyzdyq talǵamdy tómendetedi. Al talǵamnyń joqtyǵy kóptegen múmkindikterdi shekteı bastaıdy. Múmkindigi shekteýli ult! Jaqsy estile qoımaıtyn sóz. Biraq shyndyǵy sol-bizdiń múmkindigimiz kúnnen kúnge shektelip kele jatyr. Elimizdegi «ákimketistiń» sońǵy  senarıine kóz júgirtip kórińiz. Qazaqstanda Qostanaı degen qala bar emes pe edi?! Ol qalany  Ahmetbek Ahmetjanov degen azamat  basqaryp otyrady. Kúnder óte beredi. 2015 jyldyń 1-tamyzynda ákimniń orynbasary Maqsut Qalıev qaladaǵy "Premıým Palas"meıramhanasynda para aldy degen kúdikpen ustalady. Ol jalǵyz emes eken. Eki kúnnen soń,  A. Ahmetjanovtyń ekinshi orynbasarynyń da qolyna kisen salyndy. Frýnzık Arakelánnyń da kúdikke ilinip  (ákimniń  ekinshi orynbasary),  qyzmet bólmesinde ustalǵandyǵy týraly aqpar taraı bastaıdy. Bul oqıǵanyń ótkenine bir aı tola bergende ákimniń ózi ákimtaqtan bas tartýdy qup kóredi. Oblys ákimi Nuraly Sádýaqasov A. Ahmetjanovtyń jyly ornynan jylystaǵanyna qarsy bola qoımaıdy. Biraq qyzmetinen bosaǵanyna bir kún bolmaı jatyp  qalanyń burynǵy ákimi Ahmetbek Ahmetjanov 8 qyrkúıek kúni saǵat 17.05-te qyzmetin asyra paıdalandy degen kúdikpen ustaldy. Qazir ol úı qamaqta otyr. Al burynǵy ákimniń ákimdik oryntaqty bosatýyna baılanysty buıryqqa qol qoıǵan  Nuraly Sádýaqasovtyń taǵdyry basqasha órbidi. Abyroı bolǵanda deımiz be, A. Ahmetjanov pen onyń eki orynbasaryna telingen kúdik pen aıyptyń oǵan qatysy joq. Dese de qala basshysynyń qyzmetin asyra paıdalanyp, eki orynbasardyń paramen ustalǵany N. Sádýaqasovtyń qyzmetine kóleńke túsirmedi deýge kelmeıdi. Biraq Zerendi aýdanynda quramynda 15 adamy bar teatr akterleriniń toby  Aqmola, Qostanaı jáne Soltústik Qazaqstan oblystarynyń ákimderiniń aldynda qoıylym qoıypty dep taraǵan aqparat paraqor orynbasarlardyń árketinen áldeqaıda aýyr tıdi. Buǵan qatysty ákimdikke qaraıtyn baspasóz qyzmetteri qansha túsinik berse de, aqparat taratýshy tarap, naqtyraq aıtsaq Dáýlet Qýanyshbaev ózine qysym jasalyp jatqandyǵyn, osyǵan qatysty ashtyq jarıalaıtynyn Facebook paraqshasynda jazdy. Osylaısha,  Nuraly Sádýaqasovtyń ózi de ákimdik oryntaǵyn bosatty. Onyń ornyna Arhımed Muhambetov baryp jaıǵasty. Arhımed Begejanuly Muhambetov 1972 jyldyń 6 maýsymda Aqtóbe oblysy Alǵa aýdanynda dúnıege kelgen. Samara memlekettik tehnıkalyq ýnıversıteti men Qazaq-orys halyqaralyq ýnıversıtetin támamdaǵan. Mamandyǵy boıynsha - ınjener-elektrık, sonymen qatar, qarjy bakalavry.

 Ol eńbek jolyn Aqtóbe qalasynyń komersıalyq qurylymdarynda bastaǵan. Aqtóbe oblysynyń syrtqy-ekonomıkalyq baılanys jáne ınvestısıalar basqarmasynyń bastyǵy, «Shaǵyn kásipkerlikti damytý qory» AQ óńirlik dırektory, Aqtóbe qalasy ákiminiń orynbasary, Aqtóbe qalasynyń ákimi qyzmetterin atqardy. 2011 jylǵy 22 shildesinen bastap Aqtóbe oblysynyń ákimi qyzmetinde boldy. Al, Aqtóbe oblysyna Berdibek Saparbaev ákim bolyp bardy. Bas qaladaǵy  premer- mınıstr mańynan B.Saparbaevty ne úshin alshaqtatý kerek boldy?

 Bárin aı ta, birin aıt, Qostanaı oblysynyń burynǵy ákimine «saýnadaǵy serilik» dep atalatyn kúıe jaǵylyp edi ǵoı. Soǵan qaıta oralaıyqshy. Burynǵy ákim osy kúıeden betin qaıta tazarta ala ma? Qostanaı qalasynyń ákimi men qos orynbasarynyń áreketine onyń qatysy bar ma? Álde ol shynynda Qostanaıda bolyp jatqan jaıdan beıhabar, Zerendide saýnada saýyq tamashalap júrdi me? Bálkim ony qyzmetten bosatý maqsatynda osyndaı qos búıirden bir-aq soǵatyn saıası senrıı daıyndalǵan bolar. Olaı bolýy da ǵajap emes. Óıtkeni byltyr onyń oıynshyq músinin jasap kórmege qoıǵan bolatyn. Sol qalpy ákimniń sývenır músinin kórmege kim qoıǵany anyqtalmaı ketti. Al ákim ózi beınelengen 20 santımetrlik oıynshyq sývenırdi satyp alǵan bolatyn. Osylaısha qos orynbasardyń paraqorlyǵynan bastalǵan Qostanaı jyry qos ákimmen qoshtasýǵa alyp keldi. Eger Zerendidegi «Saýnadaǵy saýyq» týraly áńgime osymen sap tıyla qalsa, onda qarsy toptyń múddesi oryndaldy dep túsinýge bolatyn shyǵar. Al áńgimeniń jalǵasy bar bolsa, onda gáp shynymen ketken ákimnen shyqqan dep túsinermiz. Kim biledi? Túlki-saıasattyń quıryǵynyń bulańyn baǵyp kórelik...

Aınur Tóleý