Qazaqstan Respýblıkasy Prezıdentiniń jarlyǵymen májilis depýtaty Darıǵa Nursultanqyzy Nazarbaeva QR Premer-mınıstriniń orynbasary bolyp taǵaıyndalǵany týraly keshe «Qamshy» portaly jazǵan bolatyn.

2014 jyldan bastap QR Premer-mınıstriniń orynbasary qyzmetin atqaryp kelgen Berdibek Mashbekuly Saparbaevtyń qyzmetinen kenet tómendetilýi men májilis depýtaty, Elbasynyń súıikti qyzy Darıǵa Nursultanqyzynyń  joǵarǵy laýazymǵa aýysýy nelerdi ańǵartady? Joǵary bılik saıasatynyń tosyn aýys-túıis jasaýyna qatysty qazaqstandyq jáne reseılik saıasatkerler men saıasattanýshylar arasynda qyzý pikir-talas týdyrdy.

Ásirese, Darıǵa Nursultanqyzynyń premer-mınıstrdiń orynbasary qyzmetine taǵaıyndalýynan  Qazaqstan Prezıdenti taq murageriniń sulbasyn elestetkender de joq emes.

Qazaqstannyń bılik elıtasy belgilegen «oıyn tártibi» áldeqashan halyq baǵasyn alǵanyn eskeretin bolsaq, memlekettiń saıası-bılik júıesindegi negizgi tulǵalary memleket basshysy bolyp tabylady jáne ol bılik elıtasy ishindegi túrli yqpal etýshi toptar arasynda tepe-teńdikti ustap otyrýy tıis. Oǵan qosa, Prezıdenttiń sheshiminsiz elıtanyń eshbir ókili kelesi ekinshi Prezıdent laýazymyna úmittenýge jaǵdaıy joq.

Sońǵy ýaqyttary Prezıdenttiń densaýlyǵyna jáne jasynyń kelgendigine baılanysty saıasattanýshylar men qoǵamdyq ortada «Kelesi prezıdenttiń» sulbasyna qatysty túrli boljamdar aıtylyp keledi. Prezıdenttik orynǵa múmkindigi bar muragerdiń saıası yqpal etý deńgeıi de úlken mańyzǵa ıe ekenin eskersek, Elbasynynyń arnaıy jarlyǵymen Darıǵa Nazarbaevanyń «Qazaqstandaǵy úshinshi bılik» qyzmetine taǵaıyndalýynan astar izdeýge ábden bolatyn sekildi.

QR Prezıdentiniń jaqyn týysqandarynyń bolashaq murager retinde usynylýy tıimsiz ekenin Prezıdenttiń ózi naýryzdaǵy suhbatynda aıtqanyn bilesizder. 

Olardyń barlyǵynda jalpyǵa ortaq ishki bılik elıtasynda birshama tepe-teńdikti ustap turatyndaı memlekettik qyzmettegi tájirıbe azdyǵy men saıası yqpal deńgeıiniń tómendigi baıqalady.

Sonymen, sońǵy taǵaıyndaýdan keıingi saıasatkerler tujyrymyna nazar aýdaraıyq.

Andreı Kazansev, Máskeý memlekettik halyqaralyq qatynastar ınstıtýty «Saraptama ortalyǵy» dırektory .

-Men Darıǵa Nazarbaevanyń bul qyzmetke taǵaıyndalýynan eshqandaı sókettik kórip otyrǵan joqpyn. Darıǵa Nursultanqyzy bilikti saıasatker. Halyqaralyq deńgeıde yqpaly bar adam. Qoǵamdyq ortada da tanymaldylyqqa ıe. Men bul taǵaıyndaý arqyly Nazarbaev myrza taq muragerin kórsetkisi keledi degen pikirmen múldem kelipseımin. Óıtkeni, Darıǵa Nazarbaeva myqty saıasatker bolǵanymen, prezıdent bolýǵa onyń shamasy jetpeıdi. Onyń ústine Qazaqstan men Ortalyq Azıadaǵy qalyptasqan mádenı túsinikterge baılanysty el prezıdenttigine áıel adamdy qoıý qıyndaý bolatyny túsinikti. Sondyqtan, taq murageriniń esimi bárimiz úshin áli jumbaq kúıinde qalmaq. Onyń ústine, post-keńestik memleketterdegi jaǵdaılardy eskere otyryp, prezıdent Nazarbaev bılik basynda qalý úshin barlyq sharany qoldana alady. Bul árıne, óz basy úishin emes, halyqynyń jaǵdaıy úshin.

Andreı Cheboterov, qazaqstandyq saıasattanýshy:

-Darıǵa Nazarbaevanyń QR premer-mınıstri Kárim Másimovtiń  orynbasary laýazymyna taǵaıyndalýy osyǵan deıin aıtylyp kelgen parlament saılaýyn merziminen buryn ótkizýge sebep bolýy múmkin. Ol bul qyzmetke taǵaıyndalmas buryn, QR Májilisinde vıse-spıker bolyp qyzmet atqardy. Meniń oıymsha, bul taǵaıyndaýdy «májilisti tarqatyp jiberýdiń bir joly» dep qarastyrýǵa bolatyn sıaqty. Memleket basshysy óz qyzyn Úkimetke ákelgeni – parlamentti taratýdyń joly bolýy bek múmkin. Sondaı-aq, bul taǵaıyndaý memleket basshysy úlken qyzynyń saıası karerasyna alańdaıtynyn kórsetti.

Ol mundaı suhbatty "Novostı-Kazahstan" agenttigine telefon arqyly bergen.

Túıin:

Jalpy, eldegi bıliktiń sabaqtastyǵyn qamtamasyz etý turǵysynan saıası elıta ishindegi QR Prezıdenti N.Á.Nazarbaevtyń memleket basshysy retinde yqtımal muragerleriniń múmkindikterine qatysty baǵa beretin bolsaq, qazirgi tańda ishki bılik elıtasynda nemese opozısıada onymen teń turatyndaı tulǵa joq. Sondyqtan, Darıǵa Nursultanqyzynyń kezekti taǵaıyndalýy – ánsheıin saıası oıyn bolýy múmkin.

Nurgeldi Ábdiǵanıuly