"AQSH-tyń "ońbaǵan sanksıasynyń" qyrsyǵynan "Roskosmos" birtalaı potensıaldy kontraktilerden aıyrylyp otyr". Osylaı dep Roskosmos basshysy Dmıtrıı Rogozın málimdedi.

– Men kóptegen tapsyrys berýshilerdi bilemin, olar bizdiń raketalarmen ushqysy keledi, alaıda odan bas tartýǵa májbúr, óıtkeni kosmos apparatyndaǵy komplektilerde "made in USA" degen jazý bar", soǵan bola olar sanksıaǵa ushyramas úshin ushýdan bas tartady, – deıdi Rogozın.

Kezinde "sanksıa degenimiz – bizge tek paıda ǵana ákelmese, esh zıany joq" degenderdiń biri osy Rogozın bolatyn. Onyń "Endeshe batýtpen ushyńyzdar" degen sózi tipti mátelge aınalǵan edi. Al qarsy sanksıa retinde eger "Energomash" ǵylymı-óndiristik kásiporny AQSH-qa RD-180/RD-181 qozǵaltqyshtaryn jetkizýden bas tartsa, onda "Energomash" jylyna 10-13 mlrd paıdadan qaǵylatyn qaýpi bar, bul – kásiporynnyń jyldyq tabysynyń 1/3 bóligi, sondyqtan ol múmkin emes. Al kontrakt 2022 jyly báribir aıaqtalýǵa tıis, óıtkeni AQSH RD-180/RD-181-den áldeqaıda tıimdi óz qozǵaltqyshtaryn jasap shyǵarǵanyn jarıalady.

Sondaı-aq Reseı "Kerch buǵazy" atty apattyq-qutqarý kópfýnksıonaldyq kemesin paıdalanýǵa berý merzimin taǵy uzartty, sebebi sanksıa saldarynan eýropalyq kompanıalar tıisti komplektilik bólshekterin jetkize almaı otyr. Reseılikter qansha bildirtpeýge tyryssa da sanksıalar jumys istep jatyr. Reseı syrtqy ister mınıstri Sergeı Lavrovtyń "Reseı halyqaralyq syrtqy saýdada dollardan bas tartyp, ulttyq valútaǵa kóshý jolynda áreket etip jatyr" deýi – orystardyń óz sózimen aıtqanda "nazlo babýshke otmorojý ýshı" degeni bolǵaly tur.

Qýanysh Edilhantegi

Sholýshy