Mańǵystaý oblysy Munaıly aýdanynyń turǵyny Asyl Qalenov bes jyldan beri kondıter ónimderin shyǵarýmen aınalysyp keledi. Kásipkerdiń shyǵarǵan táttileri tek munaılylyqtarǵa ǵana emes, ózge óńir turǵyndaryna da tanylyp úlgergen. Táýligine 250-300 keli kondıter ónimin shyǵaratyn kásipker táttilerdi Atyraý, Aqtóbe, Jańaózen qalasyna jiberedi.

– Bes jyl buryn osy kásipti bastaǵan edim. Alǵashynda shı baýyrsaqtardy satylymǵa shyǵardyq. Suranys jaqsy boldy. Qazir pechene, vaflı, chak-chak syndy táttilerdi de pisiremiz. Qazirgi ýaqytta 8 adamdy jumyspen qamtyp otyrmyn. Barlyǵy osy Atameken aýylynyń turǵyndary, – dedi kásipker.

Asyl Amantaıuly shyǵarǵan ónimniń barlyǵy tabıǵı taza ónimnen jasalady. Iaǵnı, eshqandaı boıaýyshtar men hımıa joq. Bastysy GMO-syz ónim.

– Kásibimdi bastaǵanda sehty jalǵa alǵan edim. Byltyr «Nur kapıtal» baǵdarlamasy aıasynda 30 mln teńge nesıe alyp, onyń 15 mln teńgesin jeke seh salýǵa jumsadyq. 15 mln teńgege jańa tehnıka satyp aldyq. Qazir sehtyń qurylys jumysy aıaqtaldy. Tek elektr júıesin qosý qaldy. Osy jumys aıaqtalsa jańa sehqa qonys aýdaramyz. Ol da qazirgi Atameken aýylynda ornalasqan, – dedi Asyl 

Kásipker úshin qyzmetkerleriniń qolyndaǵy dıplomy mańyzdy emes. Jumysqa yntasy bar jandardy janyna jıǵan. Komandasynyń biliktiligin arttyrýdy da umyt qaldyrmaǵan. Qazirgi pandemıa kezinde Reseı eliniń, Almaty qalasynyń tájirıbeli tehnologtarynan onlaın sheberligin arttyryp otyr.