«Nur Otan» partıasy tóraǵasynyń birinshi orynbasary Baýyrjan Baıbek Memlekettik hatshy Qyrymbek Kósherbaevpen birge «ALJIR» memorıaldy-murajaı keshenine baryp, eskertkish taqtaǵa gúl shoǵyn qoıý rásimine qatysty. Bul týraly ol Facebook jelisindegi óziniń paraqshasynda jazdy. 

«Qurmetti dostar! Búgin – Saıası qýǵyn-súrgin jáne asharshylyq qurbandaryn eske alý kúni. Osyǵan oraı Memlekettik hatshy Qyrymbek Kósherbaevpen birge «ALJIR» memorıaldy-murajaı keshenine baryp, eskertkish taqtaǵa gúl shoǵyn qoıý rásimine qatystym.

Atalǵan murajaı 2007 jyly Elbasynyń pármenimen qurylyp, ony ózi kelip arnaıy ashqan bolatyn. Bul – qýǵyn-súrginde qurban bolǵan qanshama bozdaqtyń rýhyna jasalǵan taǵzym.

30-shy jyldardaǵy alapat ashtyq pen 37-niń qyrǵyny – ult tarıhyndaǵy eń bir qasiretti kezeńderdiń biri. Bul náýbetterdiń halqymyzǵa tıgizgen zardaby orasan. Qazaqtyń qanshama betkeustar tulǵalary men ozyq oıly zıalylary osy zulmattyń qurbanyna aınaldy. Olar ulttyń azattyǵyn, ózge eldermen terezesi teń el bolýyn kóksegen edi.

Sondyqtan da mundaı oqıǵalar budan bylaı qaıtalanbaýy úshin ony udaıy eske alyp, ótkennen taǵylym alyp otyrý mańyzdy.⠀

Elimizdiń Tuńǵysh Prezıdenti – Elbasy, «Nur Otan» partıasynyń tóraǵasy Nursultan Nazarbaev 1997 jyly arnaıy Jarlyqpen 31 mamyrdy – Saıası qýǵyn-súrgin qurbandaryn eske alý kúni etip belgiledi. Sodan beri elimizdiń jer-jerinde saıası qýǵyn-súrgin jáne asharshylyq qurbandaryn eske alýǵa arnalǵan eskertkishter boı kóterdi, murajaılar ashyldy, kóptegen zertteýler júrgizildi. Áli de ashylmaǵan aqtańdaqtarymyz qanshama.

Osyǵan oraı byltyr Memleket basshysy Qasym-Jomart Toqaevtyń tapsyrmasymen qurylǵan Saıası qýǵyn-súrgin qurbandaryn aqtaý jónindegi memlekettik komısıa bul iske tyń serpin berip otyr. Tarıhı ádildikti qalpyna keltirýge baǵyttalǵan bul jumysqa «Nur Otan» partıasy da belsendi atsalysýda.

Darqan da dana halqymyz almaǵaıyp kezeńderdi bastan keshse de bereke-birligin joǵaltpady, eńsesin túsirmedi. Jer aýdarylyp, taǵdyr tálkegine túsken ózge jurtqa da qamqorlyq tanytyp, pana boldy. Kezindegi Alash arystarynyń asyl armandary oryndalyp, Qazaqstan óz aldyna derbes el, álem tanyǵan irgeli memleketke aınaldy. Búginde Elbasy qalyptastyrǵan sara joldy ustanyp, beıbitshilik pen berekeli tirlikti tý etý arqyly eńseli el retinde Táýelsizdiktiń otyz jyldyǵyna qadam basyp otyr. Osy otyz jyldyń ishinde biz qansha qıyndyq kezdesse de olardy aýyzbirshilikpen eńsere bildik. Tórtkúl dúnıemen terezesi teń memleket qurdyq. Toqsanynshy jyldary nebir sáýegeıler Qazaqstanda qantógister oryn alady dep boljap edi. Olardyń degeni bolmady. Eshqandaı qantógiske jol bermedik. Yntymaǵy jarasqan, birligi bekem elge aınaldyq.

Endigi maqsat – bereke-birligimizdi arttyryp, aǵymdaǵy qıyndyqtardy ádettegideı danalyqpen eńserip, Táýelsizdigimiz ben memlekettiligimizdi qasterlep, álemdik qaýymdastyqta alar ornymyzdy aıshyqtaý, sondaı-aq, halyqtyń ál-aýqatyn kóterip, ekonomıkamyzdy ilgeriletý. Bul úshin eń aldymen aýyzbirshilik kerek. Osy jolda barymyzdy baǵalap, jetistikterimizdi eseleý – bárimizge ortaq paryz.

Qashanda ótkenin umytpaı, tarıhtan tıisti sabaq alyp, alǵa qaraı baıyppen qadam basatyn elderdiń keleshegi kemel bolmaq. Endeshe, órkenıettiń uly kóshine ilesken elimizdiń árdaıym tuǵyry nyq, bolashaǵy jarqyn bolsyn.

Eldiń erteńi úshin qurban bolǵan ata-babalarymyzdyń, aldyńǵy býynnyń rýhy shat bolsyn», – dep jazdy partıa tóraǵasynyń birinshi orynbasary.