Rejıser, óner qaıratkeri Bolat Atabaev ómirden ozdy. Jaqyndary onyń birneshe kún buryn búıregine sýyq tıgizip, aýrýhanaǵa túskenin aıtady.

Bolat Manashuly Atabaev 1952 jyly 14 mamyrda Almaty oblysy Tentek aýylynda týǵan.

1974 jyly Qazaq memlekettik halyqaralyq qatynas tilderi ýnıversıtetin, 1983 jyly teatr jáne kórkemsýret ınstıtýtyn bitirgen. 1990 jyly Germanıadaǵy Múnhen ulttyq teatrynda tájirıbeden ótken.

Rejıserlik jolyn Qaraǵandy oblysynyń Temirtaý qalasyndaǵy Nemis drama teatrynda spektáklder (F.Shıllerdiń "Zulymdyq pen mahabbaty" t.b.) qoıýmen bastaǵan. 

1990 jyly Qazaq memlekettik akademıalyq drama teatryna aýysyp, ol jerde B.Rımovanyń "Qos munlyq", M.Maqataevtyń "Qosh, mahabbat" (ekeýi de 1991), I.Orazbaevtyń "Shyńǵys han" (1994), Q.Ysqaqtyń "Jan qımaq" (1995), R.Muqanovanyń "Máńgilik bala beıne" (1996), Á.Kekilbaevtyń "Abylaı han" (1998; spektákl premerasy Nur-Sultan qalasynda ótti), A.Chehovtyń "Shaǵala" (1998), M.Meterlınktiń "Soqyrlar" (1993), B.Brehttiń "Toǵyshardń toıy" (1999); sonymen qatar R.Muqanovanyń "Qaraly sulý" (M.Áýezovtiń shyǵarmasy boıynsha; 1997, Qazaq memlekettik akademıalyq jastar men balalar teatry), R.Bolgtyń "Kishkene seri" (1981, Germanıadaǵy Parhım teatry) t.b. spektáklderdi qoıǵan.

Respýblıkalyq nemis teatryna basshylyq jasady.

Áriptesteri ony batyl sahnalyq eksperımentterge baratyn, spektákldiń kórkemdik- estetıkalyq mán-mazmunyn ashýǵa den qoıatyn izdenimpaz rejıser retinde sıpattaǵan.

Bolat Atabaev eldegi saıası-qoǵamdyq máselelerge jıi ún qatyp, bılikti synaǵan. Opozısıalyq belsendiligi úshin qýǵyndalǵan. Jańaózen oqıǵasynan keıin "áleýmettik arazdyq qozdyrý" baby boıynsha qamalyp, keıin bosatylǵan. Onyń qamalýyna qoǵamda qarsylyq tanytqandar kóp boldy.

Rejıser bosap shyqqan soń da belsendiligin toqtatpady. Biraq ony qýǵyndaý da toqtaǵan joq. Aqyry Atabaev Germanıaǵa ketip, sol jaqta on jylǵa jýyq ýaqyt turyp keldi. Germanıada dáris bergen. Byltyr sol jaqta aýyr operasıa jasatqan.

Rejıserdiń otanyna oralǵanyna kóp bolmaǵan.