Almatyda kúıeýden qaıtyp kelgen qyzyn anasy men inisi soqqyǵa jyqqan. Soqqyǵa shydamaǵan kelinshek "Jan-Saıa" daǵdarys ortalyǵynyń kómegine júgingen, dep habarlady 31 arna.

Ótken dúısenbi kúni keshki ýaqytta Zamırany anasy men inisi jumystan shyǵar sátin ańdyp, kólikke kúshtep otyrǵyzyp, qalanyń shetindegi óz aýylyna áketken.

Keıin otbasynan zábir kórgen kelinshek polısıaǵa shaǵymdanǵan. Alaıda quzyrly organdar muny "otbasylyq janjal" dep izdestirý jumystaryna kirispegen. 

– Men ajyrasqannan soń, óz otbasymnan 6 aıdan beri tek qorlyq kórip kelemin. Nege turmystaǵy qıyndyqqa shydamaısyń, dep meni urýmen boldy. Keıin otbasym bir orys ultynyń azamatymen aralasyp júrgenimdi bilip qoıyp, qarǵap, shashymnan súırep ábden urdy. Tipti murnymdy da syndyrdy. Telefonym arqyly qaıda júrgenimdi baqylaıtyn baǵdarlama ornatyp qoıǵan. Ári qaraı shydaı almaǵan soń, osy ortalyqqa qashyp ketken edim. Meni julqylap kólikke otyrǵyzyp jatqanda aınalamdaǵy birde-bir adam kómekke kelmeı, bári qarap turdy, – deıdi áıel.

"Jan-Saıa" daǵdarys ortalyǵynyń dırektory Zýlfıa Baıskakovanyń aıtýynsha, jýrnalıser keledi degendi estigen otbasy qyzdy ortalyqqa keri qaıtaryp jibergen.

– Almaty oblysy İle aýdanynyń polısıa qyzmetkerlerine biz shaǵymdanyp, qaıta-qaıta habarlasqannan keıin olar bir táýlikten soń qyzdyń úıine izdep bardy. Ýchaskelik polısıa bizge tipti otbasyndaǵy janjaldyń núktesin sheshesi qoıǵan jón dep aqyl aıtady. Biraq, bul qyz bizge óziniń týǵandary ábden sabaǵanyn aıtyp, jylap kelgen. Adam ómirine qaýip tónip turǵan kezde, polısıanyń nemquraılyǵyna qaıran qaldym, – dedi ortalyq dırektory.