Shymkentte turǵyn úılerge qurylys jumystary qaryndy júrgizilýde. Bul bir jaǵynan qalanyń kórkin ashsa, al ekinshi jaǵynan páter máselesi de sheshilmek.

Búginde mundaı kópqabatty turǵyn-úılerdiń boı kóterýi – halyq sany artqan megapolıste baspana máselesiniń ońtaıly sheshilýine aıryqsha yqpal etip otyr. «Damdes Qurylys invest» JSHS-i «Shymkent sıtı» shaǵyn aýdanyndaǵy on qabatty 6 turǵyn úıdiń qurylys-montaj jumystaryn júrgizýde. Jalpy aýmaǵy shamamen 30 000 sharshy metrdi ıaǵnı, 420 páterdi quraıdy. Óz kezeginde merdiger mekeme basshysy qurylys materıaldarynyń kúrt qymbattaýyna baılanysty, páter baǵasynyń ósetinin ashyq atap ótti.

Turǵyn úı keshenderiniń qurylys barysymen tanysqan májilis depýtaty Berik Ospanov jumystyń sapaly júrip jatqandyǵyn alǵa tartty. Sonymen qatar memleket búdjetinen de qarjylandyrý qarastyrylǵandyqtan, áleýmettik máselelerdi nazardan tys qaldyrmaý qajettigin basa atap ótti. Salynyp jatqan 420 páterdiń arasynan turmysy tómen otbasylar men áleýmettik álsiz toptaǵy azamattarǵa da baspana qarastyrylý kerektigin aıtady. Aldaǵy ýaqytta bul máseleniń ońtaıly sheshilý joldaryn naqty qolǵa alatynyn jetkizdi.

Sondaı-aq, halyqqa barynsha qolaıly jaǵdaı jasalý qajettigin jetkizip, kólik turaǵy men balalar oınaıtyn alańshanyń ornalasý aımaǵyn qaıta qarastyrý qajettigin aıtty. Aldaǵy ýaqytta Májilis depýttatary tarapynan bildirilgen usynystar Shymkent qalasynyń ákimi, «Nur Otan» partıasy fılıalynyń tóraǵasy Murat Áıtenovtiń nazaryna usynylyp, jan-jaqty talqylaný josparlanyp otyr.