Atyraý oblystyq sotynyń baspasóz qyzmeti Baqytgúl Hamenovany eki aıǵa qamaýǵa alý týraly sheshimin túsindirdi. 

Prokýrordyń ótinishi boıynsha Atyraý oblystyq sotynyń qylmystyq ister jónindegi sot alqasy oblys ákiminiń orynbasary Baqytgúl Hamenovany úıqamaqqa alý týraly Atyraý qalasy mamandandyrylǵan tergeý sotynyń 12 jeltoqsandaǵy qaýlysynyń kúshin joıdy. Jańa qaýly boıynsha Hamenova eki aıǵa qamaýǵa alyndy.

"Sot alqasy Baqytgúl Hamenovany Qylmystyq kodekstiń 366-baby 3-bóligi 2-tarmaǵynda (zańsyz áreketteri úshin para alý) kózdelgen aýyr sybaılas jemqorlyq qylmysyn jasady dep aıyptaýda. Ol oblysta basshylyq qyzmet atqarǵandyqtan jáne basqa da áleýmettik baılanystary bolǵandyqtan, qylmystyq istiń ózge de tulǵalaryna áser etip, istiń obektıvti tergelýine kedergi keltirýi múmkin" delingen habarlamada.

Eger B.Hamenovanyń qylmysy dáleldense, onyń múlki tárkilenip, 7 jyldan 12 jylǵa deıin bas bostandyǵynan aıyrylýy múmkin.

Baqytgúl Hamenova 22 jeltoqsanda tergeý ızolátoryna qamalǵan.

10 jeltoqsan kúni  Baqytgúl Hamenova men oblystyq mádenıet basqarmasynyń basshysy Aqylbek Rysqalıev 4,5 mln teńge kóleminde para aldy degen kúdikpen ustalǵan. Olar  Abaı eskertkishin ornatýǵa memlekettik satyp alý shartyn jasaǵany úshin 4,5 mıllıon teńge kóleminde para aldy degen kúdikke ilingen.