Elordada sımfonıalyq orkestrdiń súıemeldeýimen jáne vokaldyq oryndaýda qazaq tilinde Disney-diń lısenzıalanǵan «Juldyzdar sherýi» kınokonserti ótti. Konserttik baǵdarlama Qazaqstan úshin arnaıy jasalyp, kórermenderge «Bolashaq» qorynyń bastamasymen memlekettik tilge dýblájdalǵan áıgili kınokartınalardyń kompozısıalary usynyldy.

«Bolashaq» qorynyń Qamqorshylyq keńesiniń qurmetti múshesi Baýyrjan Baıbek jınalǵandardy Táýelsizdiktiń 30 jyldyǵymen quttyqtaı otyryp, Tuńǵysh Prezıdent Nursultan Nazarbaevtyń bastamasymen qolǵa alynǵan «Bolashaq» stıpendıasynyń arqasynda myńdaǵan qazaqstandyq jastardyń álemniń jetekshi oqý oryndarynda bilim alýǵa qoly jetkenin atap ótti. 2011 jyly baǵdarlama túlekteri qor qurǵan bolatyn. Atalǵan qordyń qaıyrymdylyq jáne bilim baǵdarlamalarynan bólek taǵy bir baǵyty memlekettik tildiń qoldanysyn keńeıtý bastamasy boldy. 

«2011 jyly biz tikeleı Elbasynyń qoldaýymen «Ózińnen basta» jobasyn qolǵa alǵan edik. Búginde qazaq tilindegi sapaly ári básekege qabiletti kontentti elimizdiń balalary ǵana emes, sonymen qatar álemdegi otandastarymyz da kórý múmkindigine ıe boldy. Ózderińizge málim, «Bolashaq» qory aýtıst balalardyń máselelerimen de belsendi túrde aınalysyp júr. Birneshe jyldyń ishinde biz kóptegen ınklúzıany qoldaý kabınetterin ashtyq. Búgin osy zalda da erekshe qajettilikteri bar balalar qatysyp otyr. Árbir satylǵan bıletten túsken qarajat ınklúzıvti bilim berý jobalaryn damytýǵa jumsalatyn bolady», – dedi Baýyrjan Baıbek.

Kınokonsert barysynda Nazima, Dınara Sultan, Gúlsim Myrzabekova, Ayree, Danıar Ótegen, Indı Edilbaeva jáne basqa da ánshiler Disney-diń klasıkalyq týyndylary – «Arystan patsha», «Sý perisi», «Mýlan», «Aladdın», «Pokahontas», sondaı-aq «Muzdy ólke», «Moana», «Ańdar shahary» sekildi zamanaýı anımasıalyq fılmderdiń áıgili kompoızsıalaryn oryndady. Shyǵarmalar «Astana Balet» teatrynyń sımfonıalyq orkestriniń súıemeldeýimen shyrqaldy. Orkestrdiń bas dırıjeri – Arman Orazǵalıev.

«Osynaý ǵajaıyp konsert – qordyń 10 jyldyq mereıtoıynyń qurmetine oraı elorda turǵyndaryna jasaǵan tartýy. Bul mýltımádenı is-shara balalardy súıikti múltfılmderi arqyly klasıkalyq aspaptyq mýzyka tyńdaýǵa yntalandyra otyryp, ana tilimizdiń baılyǵy men shuraılylyǵyn pash etedi. Kınokonsert bizdiń qazaq tilinde sapaly kontent jasaý boıynsha uzaq jylǵy jumysymyzdyń jalǵasy bolyp otyr. Osynaý jobalarǵa 1,5 mlrd. teńge bólgen 22 kompanıanyń demeýshilik kómeginiń arqasynda jetekshi kınokompanıalardyń 38 fılmi dýblájdaldy», – dep atap ótti qordyń qamqorshylyq keńesiniń tóraǵasy Dınara Gaplan.